قازاقستاندا تىكۇشاقتار قۇراستىرىلادى

 استانا. قازاقپارات - بيىل قازاقستاندا مي-8/17 تىكۇشاقتارى قۇراستىرىلا باستايدى. بۇل تۋرالى پارلامەنت ماجىلىسىندەگى ۇكىمەت ساعاتىندا قورعانىس جانە ايەروعارىش ونەركاسىبى ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات.
None
None

«№405 الماتى اۆياجوندەۋ زاۋىتى بازاسىندا مي-8/17 تىكۇشاقتارىن قۇراستىرۋدى ۇيىمداستىرۋ بويىنشا ۋاعدالاستىقتار جاسالدى. بيىل ءبىز قۇراستىرۋدىڭ ءبىرىنشى كەزەڭىنە كىرىسۋگە ءتيىسپىز. اتاپ ايتقاندا، بۇلار وتە سەنىمدى تىكۇشاقتار. تەحنيكا ءتۇرلى سالالاردا ءوزىن جاقسى كورسەتە الدى. سوندىقتان جاقسى سۇرانىسقا يە بولىپ وتىر»، - دەپ توقتالدى مينيستر.

 ونىڭ سوزىنە قاراعاندا، 2016 -جىلى ىسكە قوسىلعان اۆياتسيا تەحنيكاسىن قۇراستىرۋ، جوندەۋ جانە تەحنيكالىق قىزمەت كورسەتۋ جونىندەگى اۆياتسيالىق- تەحنيكالىق ورتالىق بازاسىندا 10 مايدان ۇشاقتارىنا جانە 4 اسكەري- كولىك اۆياتسياسى ۇشاقتارىنا كۇردەلى جوندەۋ جۇرگىزۋ جوسپارلانىپ وتىر. بۇل جۇمىستاردىڭ 30 پايىز كولەمىن تىكەلەي ورتالىق ورىندايدى.

«بۇل شارالار اۆياتسيا تەحنيكاسىن جوندەۋ جانە تەحنيكالىق قىزمەت كورسەتۋ پروتسەستەرىن لوكاليزاتسيالاۋ ەسەبىنەن قازاقستاندىق قامتۋدى ودان ءارى ۇلعايتۋعا، سونداي- اق جىل سايىن شەتەلگە جىبەرىلەتىن قاراجاتتىڭ ەلەۋلى بولىگىن قازاقستاندا قالدىرۋعا مۇمكىندىك بەرەدى. وسى ورايدا، جۇمىس ورىندارىن قۇرۋعا، وتاندىق اۆياتسيا ونەركاسىبىن دامىتۋعا جول اشىلادى» ، - دەپ اتاپ ءوتتى اتامقۇلوۆ.

بۇدان بۇرىن حابارلانعانداي، بەيبىت اتامقۇلوۆ استاناداعى ەۆروكوپتەر ورتالىعىندا رەسەي، ۋكراينا، موڭعوليا جانە ورتالىق ازيا ەلدەرىنەن تىكۇشاقتار جوندەۋدەن ءوتىپ جاتقانىن اتاپ ءوتتى.

 

 

 

 

سوڭعى جاڭالىقتار