عالىمدار ارىق بولۋدىڭ قاۋىپتى ەكەنىن انىقتادى

 استانا. قازاقپارات - بوستون ۋنيۆەرسيتەتىندەگى مەديتسينا مەكتەبىنىڭ عالىمدارى ارىقتىق ادامنىڭ اقىل- ەسىنە كەرى اسەرىن تيگىزەتىنىن انىقتادى.

زەرتتەۋ ناتيجەسى Journal of Alzheimer's Disease باسىلىمىندا جاريالاندى.

عالىمدار انىقتاعانداي، 50-60 جاستاعى ادامداردىڭ دەنە سالماعىنىڭ يندەكسى تومەندەگەن كەزدە، ولاردىڭ دەمەنتسياعا شالدىعۋ قاۋپى جوعارى بولادى.

ماماندار اقىل- ەستىڭ كەمۋىنە سوقتىراتىن جاڭا فاكتورلاردى انىقتاۋ ءۇشىن فرەمينگەم زەرتتەۋى بويىنشا تالداۋ جۇرگىزگەن.

اتاپ ايتقاندا، ولار ادامداردىڭ دەموگرافيالىق دەرەكتەرىن زەردەلەگەن، سونىمەن قاتار زەرتتەۋگە قاتىسقان 1979-1983 -جىلعى ادامداردىڭ اراسىندا كىمدەرگە دەمەنتسياعا شالدىعۋ دياگنوزى قويىلعانىنا دا نازار اۋدارعان.

وسىعان دەيىن جۇرگىزىلگەن زەرتتەۋلەردە ماماندار اقىل- ەسى كەمۋگە اكەلىپ سوقتىراتىن نەگىزگى فاكتور ادامنىڭ جاسىنا بايلانىستى دەگەن بايلامعا كەلگەن. ءبىراق، زەرتتەۋ جۇمىستارىنا ساي، 50-60 جاس شاماسىنداعى ارىق ادامداردىڭ تولىق دەنەلى قاتارلاستارىنا قاراعاندا دەمەنتسياعا كوبىرەك شالدىعاتىنى انىقتالعان.

دەمەنتسيا دەگەنىمىز - جوعارى پسيحيكالىق فۋنكتسيالاردىڭ جەتە دامىماۋىنان بولاتىن اقىل- ەستىڭ كەمۋى.

Baq.kz