ريم حالقى ات اربامەن سەرۋەندەۋگە تىيىم سالىنعانىن قالايدى

استانا. قازاقپارات - يتاليا استاناسى - ريمدە ءتورت تۇلىككە جانى اشىعان جۇرتشىلىق ات اربامەن سەرۋەندەۋگە تىيىم سالىنعانىن قالاپ، قول جيناۋعا كىرىستى.
None
None

  ولاردىڭ ويىنشا، قالا ورتالىعىندا جىلقىنى جۇگەندەپ، ونى قامشىلاۋ - بارىپ تۇرعان قاتىگەزدىك. بەلسەندىلەر ءتىپتى قالا مەرىنە دە حات جولداپتى.

 اندجەلو سەد - ارباكەش. 10 جىل بويى ءار اتقان تاڭىن ارباعا ات جەگۋدەن باستايدى. سونان سوڭ قالا ورتالىعىنا بارىپ، تۋريستەردى قىدىرتۋ ارقىلى ءناپاقاسىن تابادى. ونىڭ ايتۋىنشا، سەرۋەنگە ارنالعان اربالار ريمدە عاسىردان استام ۋاقىت بۇرىن پايدا بولعان. جەرگىلىكتى تۇرعىنداردىڭ جىلقىنى تىزگىندەۋگە قاتىستى نارازىلىعىن تۇسىنبەي الەك.

 اندجەلو سەد، ريم قالاسىنىڭ ارباكەشتەر قاۋىمداستىعىنىڭ باسشىسى:

 - قىزمەتىمىزدى كوپشىلىك كونە زاماننان قالعان دەپ سانايدى. الايدا بۇل جاڭساق پىكىر. ويتكەنى العاشقى ات اربا پايدا بولعان قالالاردىڭ قاتارىندا ريم دە بار. سوندىقتان بۇل - ءبىز ءۇشىن اجىراماس ءداستۇر. ارباكەشتەر كارى قۇرلىقتىڭ بارلىق قالاسىندا قىزمەت ەتەدى.

 اندجەلو «جىلقى جانۋارىنا ادالمىن، وعان زيان تيگىزۋدى ەلەستەتۋدىڭ ءوزى قيىن» دەيدى. ايتا كەتەيىك، بۇگىندە ريمدە 44 «بوتيچەللە»، ياعني ات اربا كەلۋشىلەرگە قىزمەت كورسەتەدى. جىلدىڭ ءار مەزگىلىندە، كەز كەلگەن اۋا رايىندا دەمالۋشىلار قالانى تەز ارالاپ شىعا الادى. قۇنى 100 ەۋرودان باستالادى.

دەگەنمەن ساۋىقتىڭ وسى تۇرىنە تىيىم سالۋ تۋرالى داۋ تىيىلار ەمەس. ويتكەنى ءۇزىلىسسىز بىرنەشە اينالىمنان كەيىن السىرەگەن جىلقىلار جول ورتاسىنا قۇلاي قالادى ەكەن. مۇنى كورگەن تۇرعىندار كولىك قوزعالىسىنا كەلتىرەر كەدەرگىسىنەن بۇرىن كورىنىستىڭ ايانىشتى ەكەنىن ايتىپ، نارازىلىق ءبىلدىرىپ جاتىر.

 كارلا روككي، جانۋارلاردى قورعاۋ ۇلتتىق ۇيىمىنىڭ باسشىسى:

 - ارباكەشتەر ءوز جىلقىلارىنا الاڭداسا، تاڭنان كەشكە دەيىن ارباعا جەگىپ قويماس ەدى. ريم قالاسىنىڭ جەر بەدەرى بىركەلكى ەمەس. ءبىر قىردان ەكىنشىسىنە كوتەرىلۋ جانۋارعا وڭاي دەرمىسىز. سونداي- اق تۇلىك قالاداعى كولىك گازىنان تۇنشىعادى. اتتاردى XIX عاسىرداعىداي قولدانۋ، مەنىڭشە، دۇرىس ەمەس.

قالا مەرى ۆيردجينيا رادجي ءوزىنىڭ سايلاۋالدى باعدارلاماسىندا ات اربانى قولدانۋعا تىيىم سالاتىنىن ايتقان ەدى. وسى ورايدا بيلىك ارباكەشتەردى ساياباقتارعا باعىتتاپ، اربالاردى ەلەكترلى قۇرىلعىلارعا اۋىستىرۋدى كوزدەگەن. الايدا ات اربامەن سەرۋەندەۋ ساياباقتاردا دا سانگە اينالدى. وسىلايشا بەلسەندىلەردىڭ 10 مىڭ قولى تىيىمدى قولداۋعا جەتكىلىكسىز بولىپ وتىر.

 لەو، ريم قالاسىنىڭ تۇرعىنى:

- ات ارباعا تىيىم سالىنعانىن قولدايمىن. جىلقىلار كولىك قوزعالىسىنا كەدەرگى كەلتىرەدى. مەنىڭ ويىمشا، جانۋارلار تاسجولدا ءجۇرىپ، تۇياقتارىن ءجيى زاقىمدايدى.

 ليا، ريم قالاسىنىڭ تۇرعىنى:

- ات ارباعا تىيىم سالىنعانىن قالامايمىن. ويتكەنى سەرۋەننىڭ بۇل ءتۇرىن ريم قالاسىنىڭ باستى سيمۆولىنا جاتقىزامىن. بۇگىندە قالا باسشىلىعى ارباكەشتەردى ۇيرەنشىكتى كاسىبىنەن باس تارتۋعا شاقىرىپ، ولارعا تاكسي جۇرگىزۋشىسى ليسەنزياسىن الۋدى ۇسىنىپ وتىر. الايدا سوڭعىلارى سۇيىكتى ماماندىعىن وڭايلىقپەن قيا المايتىنىن ايتىپ الەك.

www.24.kz

سوڭعى جاڭالىقتار