سەنات ءتوراعاسى بانكتەرگە ءوز اكسيونەرلەرىن نەسيەلەۋدى شەكتەۋدى ۇسىندى
«ەكىنشى دەڭگەيلى بانكتەردىڭ مەنشىك يەلەرى مەن اكسيونەرلەرىنىڭ جاۋاپكەرشىلىگىن ارتتىرۋ ماسەلەسى زاڭنامالىق رەتتەۋدى تالاپ ەتىپ وتىر. مەملەكەت باسشىسى پروبلەمالى بانكتەردىڭ اكسيونەرلەرىن نەگىزدى سىنعا الدى. وسى ورايدا ساۋىقتىرۋ شارالارىنا ولاردىڭ جەكە قارجىلارىن سالۋىن جانە سىرتقا شىعارىلعان اقشانى قايتارۋ تالاپ ەتىلدى. بانكتەرگە وزدەرىنىڭ اكتسيونەرلەرىن جانە ولارمەن بايلانىستى تۇلعالارىن نەسيەلەۋدى زاڭنامالىق تۇرعىدا شەكتەۋ قاجەت. بۇل ءوز كەزەگىندە اكتيۆتەردىڭ جىلىستاۋى تاۋەكەلدەرىن تومەندەتۋگە ىقپال ەتەدى. سەنات وسى ماڭىزدى جۇمىسقا ءوزىنىڭ ۇلەسىن قوسۋعا ءازىر»، - دەدى توقايەۆ بانك سەكتورىنداعى ماسەلەگە ارنالعان پارلامەنتتىك تىڭدالىم بارىسىندا.
سەنات ءتوراعاسى پارلامەنت ۇلتتىق بانكتىڭ قىزمەتىن جەتىلدىرۋگە باعىتتالعان باستامالاردى قولداۋعا ءازىر ەكەنىن اتاپ ءوتتى.
«ءبىز الدىن الا قارجىلىق وسال تۇستاردى انىقتاۋىمىز كەرەك، سەبەبى بۇل ماسەلە بولاشاقتا قارجىلىق تۇراقتىلىققا قاتەر تۋدىرۋى مۇمكىن. وسى ورايدا زاڭنامالىق دەڭگەيدە رەتتەۋ مەن قاداعالاۋ جۇيەلەرىن قايتا قاراستىرۋ قاجەتتىلىگى بار. پارلامەنت ۇلتتىق بانكتىڭ قىزمەتىن جەتىلدىرۋگە، ونىڭ قاداعالاۋشى مانداتىن كۇشەيتۋگە باعىتتالعان زاڭنامالىق باستامالاردى قولداۋعا دايىن»، - دەدى قاسىم-جومارت توقايەۆ.
بۇدان بۇرىن حابارلانعانداي، سەنات ءتوراعاسى بانكتەردىڭ مەنەدجمەنتى كۇردەلى وزگەرىستەردىڭ قىسىمىنا توتەپ بەرە المايتىنىن ءمالىم ەتكەن ەدى.
