شاڭحاي ىنتىماقتاستىق ۇيىمى سامميتى «ۇلكەن ەۋرازيالىق سەگىزدىك» رەتىندە وتەدى

بۇل تۋرالى بۇگىن ەلوردادا ءوتىپ جاتقان شاڭحاي ىنتىماقتاستىق ۇيىمى فورۋمىنىڭ ⅩⅢوتىرىسىندا ش ى ۇ باس حاتشىسىنىڭ ورىنباسارى ايزادا سۋباقوجايەۆا ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا شاڭحاي ىنتىماقتاستىق ۇيىمى ءوزىنىڭ «ۇلكەن ەۋرازيالىق سەگىزدىك» فورماتىنداعى ءبىرىنشى سامميتىنە جان-جاقتى دايىندىق جۇرگىزىپ جاتىر. وزدەرىڭىز دە بىلەتىندەي ءاربىر سامميتتە ۇيىمنىڭ دامۋ تاريحىنىڭ جاڭا تاراۋلارى جازىلىپ، ناقتى شىنايى ۋاقىتقا ساي كەلەتىن جاڭا مىندەتتەر قويىلادى. الداعى ۋاقىتتا سامميتتكە ش ى ۇ ەلدەرىنىڭ كوشباسشىلارى جاڭا فورماتتا ۇيىمدى ودان ارى دامىتۋدىڭ ءبىرىنشى كەزەكتى مىندەتتەرىن، سونىمەن قاتار وزەكتى حالىقارالىق جانە وڭىرلىك پروبلەمالاردى قاراستىرادى دەپ كۇتىلۋدە»، - دەدى ول.
ايزادا سۋباقوجايەۆانىڭ ايتۋىنشا، ماۋسىم ايىندا قىتايدىڭ تسينداو قالاسىندا وتەتىن سامميت ءوڭىر مەن الەمدەگى بەيبىتشىلىك پەن تۇراقتىلىقتى قولداۋ، سونىمەن بىرگە ۇيىم اياسىنداعى كوپبەيىندى ءوزارا ءىس-قيمىلدى تەرەڭدەتۋگە ايرىقشا ۇلەس قوساتىن بولادى. فورۋم ناتيجەسىندە ناقتى ۇسىنىستار مەن ۇسىنىمدار دايىندالادى.
فورۋم جۇمىسىنا قىتاي، رەسەي، ءۇندىستان، پاكىستان، يران، اۋعانستان، بەلارۋس جانە ورتالىق ازيا مەملەكەتتەرىنەن كەلگەن دەلەگاتتار قاتىسۋدا.
ايتا كەتەرلىگى، وسى جىلدىڭ ماۋسىم ايىندا قىتايدىڭ تسينداو قالاسىندا وتەتىن ش ى ۇ سامميتىنە ەلباسى نۇرسۇلتان نازاربايەۆ قاتىسادى دەپ كۇتىلۋدە.