مانشۇك مامەتوۆانىڭ ەرلىگىنە ارنالعان اۆتوشەرۋ ورالدان نيەۆەلگە جەتپەك

م. مامەتوۆا اتىنداعى مەموريالدىق مۋزەيىنىڭ ديرەكتورى، اۆتوجورىق جەتەكشىسى سۆەتلانا بەكتەنوۆانىڭ ايتۋىنشا، اۆتوجورىققا قاتىسۋشىلار سامارا، ماسكەۋ ارقىلى قازاقتىڭ قوس باتىر قىزى مانشۇك پەن ءاليانىڭ، سونداي-اق قازاقستاندا قۇرىلعان 100- جانە 101-اتقىشتار بريگادالارىنىڭ پسكوۆ وبلىسىنداعى سوعىسقان جەرلەرىمەن ءجۇرىپ ءوتىپ، جەڭىس كۇنىن نيەۆەل قالاسىندا اتاپ وتپەك.
باتىس قازاقستاندىق دەلەگاتسيا قۇرامىندا مۋزەي قىزمەتكەرلەرى، ستۋدەنتتەر مەن وقۋشىلار بار. 12- مامىرعا دەيىن سوزىلاتىن جورىق بارىسىندا رجيەۆ، ۆەليكيە لۋكي، نوۆوسوكولنيكي قالالارىنداعى باۋىرلاستار زيراتىنا گۇل شوقتارى قويىلادى. بۇدان بۇرىن كەتكەن دەلەگاتسيانىڭ بەس مۇشەسى نيەۆەل قالاسىنان 40 شاقىرىم جەردەگى پۋستوشكا قالاسى ماڭىندا دالالىق لاگەردە ىزدەستىرۋ جۇمىستارىن جۇرگىزۋدە. اۆتوجورىققا قاتىسۋشىلار سوعان قوسىلادى.
«نيەۆەل قالاسىندا مانشۇك مامەتوۆانىڭ جەرلەنگەنى بەلگىلى. بيىل 15- قازاندا ونىڭ ەرلىگىنە 75 جىل تولماق. قازاقتىڭ باتىر قىزىنىڭ قاھارماندىعىن رەسەيلىكتەر دە ۇمىتپاق ەمەس. سونىمەن قاتار ەسىمدەرى ءالى كۇنگە دەيىن بەلگىسىز بولىپ قالىپ وتىرعان جاۋىنگەرلەر از ەمەس. ولاردى انىقتاۋ ءۇشىن سمولەنسك، حاباروۆسك، ۆولگوگراد، سانكت-پەتەربور، كالۋگا، دونداعى روستوۆ قالالارىنان كەلگەن ءىز كەسۋشىلەرمەن بىرگە ءبىز دە جۇمىستانامىز. مۋزەيىمىزگە قاجەتتى قۇندى جادىگەرلەر اكەلۋ دە ويىمىزدا»، - دەدى س. بەكتەنوۆا.
ەسكە سالا كەتەيىك، استانادا بيىل مانشۇك مامەتوۆاعا ەسكەرتكىش ورناتىلاتىنىن بۇدان بۇرىن جازعان بولاتىنبىز. ال قازاقتىڭ باتىر قىزىنا العاشقى ەسكەرتكىش 1979-جىلى نيەۆەل قالاسىندا ورناتىلعان.