شىعىس قازاقستاندا «امىرە» فيلمىنىڭ كورسەتىلىمى ءجۇرىپ جاتىر

ايتا كەتۋ كەرەك، ءبىرتۋار تۇلعا شىعىس قازاقستاننىڭ قاينار اۋىلىندا دۇنيەگە كەلگەن. بيىل ونىڭ 130 جىلدىق مەرەيتويى تويلانۋدا.
قالا تۇرعىندارىمەن بىرگە تۋىندىنى وبلىس اكىمى دانيال احمەتوۆ تە تاماشالادى. ايماق باسشىسى فيلم كورەرمەنگە ادەتتەگى تۋىندىلارداعىداي كوشپەلى ەلدىڭ تۇرمىسىنىڭ بەينەسىن ەمەس، قازاق بولمىسىنىڭ باسقا قىرىن جەتكىزگەنىن ايتادى.
«ءبىز ەۋروپاداعى ءومىردىڭ ءبىر ءساتىن جانە امىرە قاشاۋبايەۆتىڭ باسقا بەينەسىن كورە الدىق. ول تەك تۋما تالانت ەمەس، ەڭ ءبىرىنشى، ۇلى دالا مادەنيەتىنىڭ بەينەسى. سونداي-اق، ايگىلى ءانشىنىڭ ىشكى مادەنيەتىنىڭ تەرەڭدىگىن تاني الدىق. ارينە، ونىڭ ءبارى كەۋدەگە ەرەكشە سەزىم ۇيالاتادى. ايتارىم، بۇل فيلمدە ەۋروپانى ءتانتى ەتكەن ءبىزدىڭ جوعارى مادەنيەتىمىز كورسەتىلگەن»، - دەدى دانيال احمەتوۆ.
امىرە قاشاۋبايەۆ 1925-جىلى EXPO اياسىندا بۇكىل الەمدىك مۋزىكالىق بايقاۋعا، پاريجگە اتتانادى. فرانسيا استاناسىندا ول ك س ر و دەلەگاتسياسىنىڭ ءارتىسى رەتىندە تورتكۇل تاراپتى ءدۇر سىلكىندىرىپ، كۇمىس جۇلدەنى جەڭىپ الادى. ول ەۋروپا بۇقاراسىنا ءبىرىنشى بولىپ قازاقتىڭ ۆوكالدىق-ورىنداۋشىلىق ونەرىن كورسەتىپ، ۇلتتىق اسپابى - دومبىرانى تانىتادى.
«فيلم ءبىزدىڭ قازاق زيالىلارى اياۋسىز قۋعىن-سۇرگىنگە ۇشىراعان تاريحي كەزەڭدى بايان ەتەدى. فيلمدە ول تۋرالى انىق كورسەتىلمەسە دە، سول سۇم جىلداردىڭ العاشقى پاراقتارىن اشادى. ءبىز ول تۋرالى بىلەمىز جانە تاريحتىڭ بۇل كەزەڭى تەرەڭ زەرتتەلۋى ءتيىس»، - دەدى ش ق و اكىمى.
ايتا كەتسەك، فيلمدە امىرە ورىنداۋىندا «بالقاديشا»، «ءۇش دوس»، «دۋدار-اي» جانە «بەس قاراگەر» اندەرى ورىندالدى. ءتۇسىرىلىم لاتۆيادا، لوس-اندجەلەستە، سونداي-اق، الماتى وبلىسىنىڭ ءۇشقوڭىر اۋىلىندا وتەدى.