قوستاناي وبلىسىندا قىزىل كىتاپقا ەنگىزىلگەن قۇلاندار تابيعات اياسىنا جىبەرىلدى

بۇل تۋرالى قوستاناي وبلىسى ورمان شارۋاشىلىعى جانە جانۋارلار الەمى اۋماقتىق ينسپەكتسياسىنىڭ باس مامانى مۇرات بايدىلدين ءمالىم ەتتى، دەپ حابارلايدى قازاقپارات.
قازاقستاندا قۇلاندار 1930-جىلدارى پايدا كوزىنە اينالىپ، جوعالۋعا شاق قالعان بولاتىن. قازىرگى تاڭدا ەلىمىزدە جوعالىپ بارا جاتقان اڭداردىڭ تۇرلەرىن قالپىنا كەلتىرۋدىڭ ەڭ ءتيىمدى تاسىلدەرىنىڭ ءبىرى رەينترودۋكتسيا، ياعني جەرسىندىرۋ بولىپ تابىلادى. بۇل ءتاسىل قازاقستاندا ونداعان جىلدار بۇرىن قولدانىلا باستاعان جانە سونىڭ ارقاسىندا وسى كەزدە ماماندار ايتارلىقتاي تاجىريبە جيناپ تا ۇلگەردى.
«قۇلاندى رەينترودۋكتسيالاۋ شارالارى قازاقستاندا بىرنەشە كەزەڭ بويىنشا جۇزەگە اسىرىلا باستادى. 1953-1961-جىلدارى بارساكەلمەس ارالىنا بادحىز قورىعىنان 14 قۇلان جەتكىزىلگەن. قۇلاندار سانى 200 باستان اسقان سوڭ ولاردى قۇرلىققا شىعارۋ كەزەڭى باستالدى. كەشىرەك قۇلاندار التىن ەمەلگە اكەلىنىپ، بۇگىندە ولاردىڭ سانى 3417 گە جەتتى»، - دەپ مالىمدەدى م. ءبايدىلدين.
قوستاناي وبلىسىنىڭ تورعاي دالاسى بۇگىنگى تاڭدا كەزىندە وسى ايماقتى مەكەندەگەن قۇلان مەن جابايى جىلقىلاردى قالپىنا كەلتىرۋگە بولاتىن ءىرى ايماقتاردىڭ ءبىرى سانالادى.
اۋماقتىق ينسپەكسيا وكىلدەرىنىڭ حابارلاۋىنشا، 2017-2020-جىلدارى قازاقستاندا قۇلاندى جەرسىندىرۋ جۇمىستارىن قولعا الۋ جوسپارلانعان.
«2017-جىلدىڭ 24- قازانىندا جانگەلدين اۋدانىنداعى «التىن دالا» رەزەرۆاتىنىڭ ايماعىنا جانۋارلاردى جىبەرۋ مەن قابىلداۋ جونىندەگى كوميسسيانىڭ قاتىسۋىمەن 9 قۇلان بوستاندىققا جىبەرىلگەن. ولاردىڭ 1 ەۋى ەركەك، 4 ەۋى ۇرعاشى، 4 ەۋى ولاردىڭ تولدەرى. 4 قۇلانعا سپۋتنيكپەن بايلانىسى بار مويىن باۋلارى تاعىلدى»، - دەدى ينسپەكتسيانىڭ باس مامانى.
«قىس مەزگىلىندە قۇلاندار 50 گەكتاردى قامتيتىن ارنايى قورشالعان ايماقتا ۇستالاتىن. جانۋارلاردىڭ سۋلى ءارى جەم-ءشوبى جەتكىلىكتى بولدى. ەندى مىنە، ءساۋىر ايىندا قۇلاندار «التىن دالا» رەزەرۆاتىنا تابيعات اياسىنا جىبەرىلدى.