قازاق تۇسىرمەگەنى كورىنىپ تۇر: وتاندىق تانىمالدار «امىرە» فيلمىن قاتال سىنعا الدى

استانا. قازاقپارات -«امىرە» فيلمىنىڭ ەكىنشى كورسەتىلىمىن ۇيىمداستىرعان مەيرامبەك بەسبايەۆتىڭ ءوزى جايسىز جاعدايعا تاپ بولدى.

تاريحي درامانى تاماشالاۋعا كەلگەن قازاق ونەرى وكىلدەرى مەن شوۋ-بيزنەستەگى ارىپتەستەرى قاشاۋبايەۆ جايلى كارتينانىڭ كەمشىن تۇستارىن تىزبەكتەپ بەرگەن. بۇل شاراعا Stan.kz اقپاراتتىق اگەنتتىگىنىڭ ءتىلشىسى دە قاتىسىپ قايتقان بولاتىن.

قازاق تۇسىرمەگەنى كورىنىپ تۇر: وتاندىق تانىمالدار «امىرە» ءفيلمىن قاتال سىنعا الدى

«ءبىزدىڭ ماقساتىمىز قازاقتىڭ ابىرويىن اسقاقتاتقان امىرە اتامىز تۋرالى كينونى ناسيحاتتاۋ. بۇل كينونى ونەر ادامدارى ءبىرىنشى كورۋ كەرەك دەپ ويلايمىن. ونەر ادامدارى دارىپتەۋ كەرەك. سول ارقىلى ءبىزدىڭ كەلەشەك ۇرپاق امىرەنىڭ كىم ەكەنىن بىلەدى. ارى قاراي عاسىردان عاسىرعا كەتسە ەكەن. سوندىقتان بۇگىن زيالى قاۋىم، اقىن-جازۋشىلار، كومپوزيتورلار، ونەر ادامدارى كەلىپ كورىپ جاتقانى مەنى قۋانتادى»، - دەيدى مەيرامبەك بەسبايەۆ.

ءبىراق كورسەتىلىمگە كەلگەن جۇلدىزدار «امىرە» كارتيناسىنان كوڭىلسىز شىقتى. ويتكەنى، تاريحي درامانىڭ كەمشىن تۇستارى كوپ. اتالمىش كينوتۋىندىعا سىن ايتقانداردىڭ العاشقىسى مارات وماروۆ. سازگەردىڭ سوزىنشە، امىرەنىڭ رەپەرتۋارىن تاڭداۋداعى قاتەلىكتەر مەن فيلم سيۋجەتىندەگى ولقىلىقتاردان كوز سۇرىنەدى.

«تاريحتى بىلمەي، بولاشاقتى بولجاۋعا بولمايدى. كەيبىر ساپاسىز نارسەلەر بولدى. شىنىن ايتۋ كەرەك. ەڭ سوڭىندا «دۋدار-ايدىڭ» ورىنىنا، «بالقاديشانى» ايتۋ كەرەك پە ەدى. داۋىستى كەڭىنەن اشىپ، دياپازوندى كورسەتۋ كەرەك ەدى. تاڭقالدىراتىنداي، شىنىمەن دە پاريجدە ەكىنشى جۇلدەگە لايىق بولاتىنداي كەلتىرۋ كەرەك ەدى. بۇل ءبىرىنشى كەمشىلىگى. ەكىنشى كەمشىلىگى ەكسپو كورمەسى دەگەندى ءبىز باسقاشا تۇسىنەمىز. ول جەرگە تەك قانا رەسەي مەن قازاقستان ەمەس، گرۋزيا، ءازىربايجان، بۇكىل كەڭەس وداعىنىڭ ءبارى بارعان. ولاردى نەگە كورسەتپەدى؟ ولار دا سايىسقا قاتىستى عوي. 250-300 گە جۋىق ۇلت وكىلدەرى بارۋ كەرەك ەدى. سولاردى كورسەتۋ كەرەك ەدى. وندا شىنىمەن دە شىندىققا ۇيلەسەتىن ەدى. تەك قانا رەسەي، قازاقستانمەن شەكتەلىپ قالعان»، -  دەيدى مارات وماروۆ.

كورەرمەندەردىڭ قاتارىندا وتىرعان التىنبەك قورازبايەۆتىڭ دا ايتار سىني-پىكىرلەرى بار. فيلمدى كورگەن حالىق ءارتىسى، امىرەنىڭ داۋىسىنداعى كەمشىلىكتەردىڭ قۇلاققا تۇرپىدەي تيگەنىن جاسىرمادى.

«نەشە ءتۇرلى قازاقتىڭ حالىق اندەرىن ايتتى عوي. مۇنى تاعى ءبىر رەت تازالاپ بارىپ، ءانشىنى قايتا قايرىپ، ادەمىلەپ بارىپ ايتقىزۋ كەرەك ەدى. اسىعىستاۋ ايتقان سياقتى. داۋىس جازعان كەزدە اسىقپاي جازۋ كەرەك ەدى. سەرجان دەگەن ءىنىمىز عوي، اندەردى ورىنداعان. سول انشىگە بىرنەشە رەت قايتالاتىپ بارىپ، جازعان دۇرىس ەدى. ىشىندە مۇكىستەر بار. مەن ەندى ءانشى بولعاننان كەيىن، مامان بولعاننان كەيىن ءبىلىپ وتىرمىن»، - دەيدى التىنبەك قورازبايەۆ.

«امىرە» كارتيناسىنىڭ وسال تۇستارىن بايقاعان تەك اعا بۋىن ەمەس. نۇرجان كەرمەنبايەۆ قازاق كولوريتتىڭ جوقتىعىن جەتكىزدى.

«وسال تۇستارى بار. رەجيسسەر قازاق بولماعاننان كەيىن، قازاقتىڭ دراماتيۋرگياسىن بەرە الماعانداي بولىپ سەزىندىم. مەن ەندى مۋزىكانت بولعاننان كەيىن، ەندى شىندىقتى ايتۋ كەرەك. كەلىپ الىپ، كۇشتى دەگەن دۇرىس ەمەس. قازاقىلىقتان گورى، ەۋروپالىق تىرلىكتەر كوپ كورسەتىلگەن. جانە دە مەنىڭ كىشىگىرىم سەنبەي قالعان جەرلەرىم ول رەپەرتۋارعا كەلگەن كەزدە سەنىمسىزدىك تانىتتىم. ءان ايتقان كەزدە قوزعالىستارى، قىلىقتارى، ديكسياسى سايكەس كەلمەگەن سياقتى كورىندى. تولىقتاي كەلىسە المادىم»، - دەيدى نۇرجان كەرمەنبايەۆ.