ءباھادۇر بابالاردىڭ ەرەن ەڭبەگىن ەگەمەن ەلدىڭ ەرلەرى لايىقتى جالعاستىرۋدا - ەلباسى

استانا. قازاقپارات - ءباھادۇر بابالاردىڭ ەرەن ەڭبەگىن ەگەمەن ەلدىڭ ەرلەرى لايىقتى جالعاستىرۋدا. بۇل تۋرالى بۇگىن اقوردادا ءبىرقاتار تۇلعالارعا جوعارى اسكەري جانە ارناۋلى اتاقتار، سىنىپتىق شەندەر جانە بىلىكتىلىك سىنىبىن تابىستاعان ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«بارشاڭىزدى كەلە جاتقان وتان قورعاۋشى كۇنىمەن جانە ۇلى جەڭىس مەرەكەسىمەن شىن جۇرەگىممەن قۇتتىقتايمىن. قاتار اتالعان وسى قوس مەرەكەنىڭ الدىندا ءار ۋاقىتتا باس قولباسشى رەتىندە جوعارى دارەجەلى شەندەر مەن اتاقتاردى جانە ماراپاتتاۋدى جاسايتىنىمدى وزدەرىڭىز بىلەسىزدەر. ەرلىك پەن پاتريتوزيمگە دارىپتەيتىن وسى ايتۋلى كۇندەر بيىل استانانىڭ 20 جىلدىق مەرەيتويىمەن تۋرا كەلىپ وتىر. «قازاقتا ەلدى قورعاۋ ەردىڭ ءىسى، ەردى قولداۋ ەلدىڭ ءىسى» دەگەن قاناتتى ءسوز بار. سوندىقتان مەن بۇگىن سىزدەرگە جەتىستىكتەرىڭىز ءۇشىن، حالىققا ۇزدىك قىزمەتتەرىڭىز ءۇشىن ارناۋلى اتاقتار مەن شەندەردى تاپسىرعالى وتىرمىن»، - دەپ اتاپ ءوتتى ەلباسى.

سونىمەن قاتار مەملەكەت باسشىسى ءمىنسىز اسكەري قىزمەتى مەن ەرەن ەڭبەگىمەن ەرەكشەلەنگەن ازاماتتارعا دا ەلىمىزدىڭ جوعارى دارەجەلى وردەن، مەدالدارىن تاپسىرعالى وتىرعانىن اتاپ ءوتتى.

«ءبىز شيرەك عاسىردان استام ۋاقىتتىڭ ىشىندە انتقا بەرىك، اماناتقا ادال ايبىندى ارميامىزدى تاربيەلەپ، ونى جابدىقتاپ كەلەمىز. سايىپقىران ساربازدارىمىز بەن ساردارلارىمىز قاستەرلى تاۋەلسىزدىگىمىزدىڭ قورعانى بولا ءبىلدى، بولا بەرەدى دەپ تە سەنەمىن. «ۇرانى بار ەلدىڭ ۇلانى بار» دەگەن. ۇيىتقىسى بەرىك ۇلاندارىمىز اسكەري الەۋەتتى نىعايتىپ كەلەدى. ءباھادۇر بابالاردىڭ ەرەن ەڭبەگىن ەگەمەن ەلدىڭ ەرلەرى لايىقتى جالعاستىرۋدا دەپ ايتۋعا بولادى»، - دەدى نۇرسۇلتان نازاربايەۆ.

اۆتور: مارلان جيەمباي