بەلگىلى قازاق فيلولوگى شورا سارىبايەۆ قايتىس بولدى
بۇل تۋرالى مارقۇمنىڭ تۋىستارى مەن ارىپتەستەرى الەۋمەتتىك جەلىدە حابارلادى.
«بار عۇمىرىن انا ءتىلى عىلىمىنا ارناعان شورا شامعالي ۇلى 60 جىلداي ا. بايتۇرسىنوۆ اتىنداعى ءتىل ءبىلىمى ينستيتۋتىندا ەڭبەك ەتىپ، ونداعان عىلىم دوكتورى مەن كانديداتتارىن تاربيەلەپ، ارتىندا وتىز تومنان استام فۋندامەنتالدىق ەڭبەك قالدىردى. اۆتوردىڭ قازاق ءتىلى گرامماتيكاسى، لەكسيكا، لەكسيكوگرافيا، ديالەكتولوگيا، ءتىل ءبىلىمى تاريحى مەن ەسىمنامانى قامتيتىن «قازاق ءتىل ءبىلىمى ماسەلەلەرى» مونوگرافياسى انا ءتىلىمىزدىڭ حرەستوماتياسىنا اينالدى. سوڭعى دەمى تاۋسىلعانشا قولىنان قالامى تۇسپەگەن ش. ش سارىبايدىڭ ەڭبەكتەرى وزبەك، اراب، قىرعىز، تاتار، تۇرىك، ازەربايجان ت. ب. تىلدەرگە اۋدارىلىپ، تۇركى تىلدەرىنىڭ دامۋىنا دا ەلەۋلى ۇلەس قوستى»، - دەپ جازدى حالىقارالىق ادام كاپيتالى ينستيتۋتىنىڭ باسشىسى جانۇزاق اكىم فەيسبۋكتەگى پاراقشاسىنا.
شورا شامعالي ۇلى سارىبايەۆ 1925 - جىلى 2 - ناۋرىزدا تاشكەنت قالاسىندا دۇنيەگە كەلگەن. ءتىل ءبىلىمى مامانى، فيلولوگيا عىلىمي دوكتورى (1974 ج. )، پروفەسسور. (1979 ج.)، ق ر ۇ ع ا كوررەسپوندەنت مۇشەسى، (1983 ج.)، قازاقستاننىڭ ەڭبەك سىڭىرگەن عىلىم قايراتكەرى (1985). ونىڭ عىلىمي زەرتتەۋ ەڭبەكتەرى ديالەكتولوگيا، مورفولوگيا، لەكسيكولوگيا، لەكسيكوگرافيا، بيبليوگرافيا، ءتىل تاريحى، اۋدارما، ەسىمناما، التايستيكا ماسەلەلەرىنە ارنالعان. 250-دەن استام عىلىمي ماقالالارى مەن وقۋلىقتارى، مونوگرافيالارى جارىق كورگەن. س. امانجولوۆتىڭ تىلدەگى ديالەكتىلەردى توپتاۋ تەورياسىن ءارى قاراي دامىتىپ، ديالەكتولوگيا سالاسىنداعى تەرميندەردىڭ قالىپتاسۋىنا اتسالىسقان. «قازاق ءتىلىنىڭ قىسقاشا ەتيمولوگيالىق سوزدىگىن» (1966)، «قازاق ءتىلىنىڭ ديالەكتولوگيالىق سوزدىگىن» (1969)، «جاڭا اتاۋلار سوزدىگىن» (1992) قۇراستىرۋعا قاتىسقان.
1965 -جىلى ا ق ش- تاعى گارۆارد كورپوراتسياسىنىڭ مۇشەلىگىنە سايلانعان، گ ف ر- دا (1975)، تۇركيادا (1994) وتكەن حالىقارالىق كونگرەسس، كونفەرەنسيالاردا باياندامالار جاساعان.
مارقۇممەن قوشتاسۋ ءراسىمى 3 - مامىر كۇنى ساعات 10.00-دە الماتىداعى عىلىم اكادەمياسى عيماراتىندا (قۇرمانعازى كوشەسى، 29- ءۇي) وتەدى.
اۆتور: ايجان سەرىكجان قىزى
