الماتىدا ب ۇ ۇ- نىڭ جاستارعا ارنالعان وكىلدىگى اشىلادى

 استانا. قازاقپارات - قازاق مەملەكەتتىك قىزدار پەداگوگيكالىق ۋنيۆەرسيتەتىندە ب ۇ ۇ تۇرعىن حالىق سالاسىنداعى قورى «جاس قۇرداستار» اتتى جاستار جەلىسىنىڭ وكىلدىگى اشىلادى، دەپ حابارلايدى قازاقپارات.

اتالعان وقۋ ورنىنىڭ باسپا ءسوز قىزمەتى تاراتقان مالىمەتكە سايكەس، بۇل جايىندا قىزدار ۋنيۆەرسيتەتىنىڭ رەكتورى گاۋحار الدامبەرگەنوۆانىڭ بۇۇ تۇرعىن حالىق سالاسىنداعى قورىنىڭ قازاقستانداعى وكىلى دجۋليا ۆالەزەمەن جانە اتقارۋشى وكىلى رايىمبەك سيسەماليەۆپەن كەزدەسۋى بارىسىندا بەلگىلى بولدى.

جۇزدەسۋ كەزىندە گ. الدامبەرگەنوۆا ب ۇ ۇ تۇرعىن حالىق سالاسىنداعى قورىنىڭ قازاقستان حالقىنىڭ تۇراقتى دامۋى مەن ءال- اۋقاتى ارتۋىنداعى ەلەۋلى ۇلەسىن اتاپ ءوتتى. سونىمەن قاتار، تاراپتار اتالعان قوردىڭ «جاس قۇرداستار» اتتى جاستار قوزعالىسىمەن بىرلەسىپ، قىزدار ۋنيۆەرسيتەتىنىڭ ستۋدەنتتەرىنە گەندەرلىك تەڭدىك جايىندا، جاستاردىڭ كوشباسشىلىق دەڭگەيىن كوتەرۋ ماقساتىندا سەمينارلار مەن ترەنينگتەر وتكىزۋگە ۋاعدالاستى. سونداي- اق، بۇۇ قورىمەن بىرىگىپ جۇمىس جاساۋ جاستارعا ءتالىم- تاربيە بەرۋدە ودان دا جوعارى ناتيجەلەرگە قول جەتكىزەتىنىنە سەنىم ءبىلدىرىلدى.

 «قارا شاڭىراق قىزدار ۋنيۆەرسيتەتى ستۋدەنتتەردىڭ تەك وقۋ جەتىستىكتەرىنە عانا ەمەس، سونىمەن قاتار قىزدار تاربيەسىنە، ولاردىڭ كوشباسشىلىق قاسيەتتەرى مەن بەلسەندى ازاماتتىق جاۋاپكەرشىلىگىنىڭ دامۋىنا دا ۇلكەن كوڭىل بولەدى» ، - دەدى گاۋحار تورەمۇرات قىزى.

ءوز كەزەگىندە قور وكىلدەرى قازاقستان حالقىنىڭ تۇراقتى دامۋى مەن ءال- اۋقاتىن ارتتىرۋداعى ۇيىمنىڭ ەلەۋلى ۇلەسى تۋراسىندا اڭگىمەلەدى.

«ب ۇ ۇ تۇرعىن حالىق سالاسىنداعى قورى قىزمەتىنىڭ نەگىزگى مىندەتى انا دەنساۋلىعىن جاقسارتۋ جانە ايەلدەر، جاستار مەن جاسوسپىرىمدەردىڭ ءومىرىن جاقسارتۋ ءۇشىن ءناپسىقۇمارلىق جانە رەپرودۋكتيۆتىك دەنساۋلىق پەن رەپرودۋكتيۆتىك قۇقىقتاردى قورعاۋعا جاردەمدەسۋ ارقىلى دامۋ سالاسىنداعى مىڭجىلدىقتىڭ بەسىنشى ماقساتىنا قول جەتكىزۋگە كومەك كورسەتۋ» ، - دەدى دجۋليا ۆالەزە.

ول پەداگوگيكالىق وقۋ ورنىمەن بولاشاقتا بىرلەسىپ اتقارىلاتىن جۇمىستىڭ ماڭىزدىلىعىن باياندادى.

د. ۆالەزەنىڭ ايتۋىنشا، جاستار اراسىندا تاربيە بەرۋ مەن اقپاراتتاندىرۋ جۇمىستارىن جۇرگىزۋ، ولاردىڭ جەكە ازاماتتىق پوزيتسياسىن قالىپتاستىرۋ مەن كوشباسشىلىق الەۋەتىن دامىتۋ بۇگىندە ۇلكەن ماڭىزعا يە.

سونداي- اق، كەزدەسۋدە تاراپتار گەندەرلىك ساياسات جانە الەۋمەتتىك ماسەلەلەر تۇرعىسىندا جوبالاردى بىرلەسىپ جۇزەگە اسىرۋ جايىن دا تالقىلادى.