شىعىس قازاقستاننان قىتايعا بال، بالىق جانە ەت ەكسپورتتالماق

وسكەمەن. قازاقپارات - شىعىس قازاقستاننان قىتايعا بال، بالىق جانە ەت ونىمدەرىن ەكسپورتتاۋ ماسەلەسى تالقىلاندى، دەپ حابارلايدى قازاقپارات ءتىلشىسى.

قىتايدىڭ كارانتيندىك قىزمەت وكىلدەرى مەن قازاقستاننىڭ ۆەتەرينارلىق باقىلاۋ جانە قاداعالاۋ كوميتەتىنىڭ وكىلدەرى وسكەمەندە باس قوسىپ، «نۇرلى جول» باعدارلاماسى اياسىندا جىبەك جولىن قايتا جاڭعىرتۋ ماسەلەلەرىن تالقىلادى.

«بىرلەسكەن جۇمىستاردىڭ ناتيجەسى سىزدەردىڭ مەملەكەت باسشىلارىڭىزدىڭ بىزدەگى «نۇرلى جول» باعدارلاماسى ارقىلى جىبەك جولىن قايتا جاڭعىرتۋ تۋرالى ۇسىنىسىن ىسكە اسىرۋعا كومەكتەسەدى دەپ ۇمىتتەنەمىز. بۇل وبلىس قازاقستانداعى بالدىڭ 75 پايىزىن ءوندىرىپ وتىر. سوندىقتان، ەكىجاقتى قارىم-قاتىناستى وسى وڭىردەن باستاپ وتىرمىز»، - دەدى ۆەتەرينارلىق باقىلاۋ جانە قاداعالاۋ كوميتەتى ءتوراعاسىنىڭ ورىنباسارى ولجاس اساۋبايەۆ.

قىتاي تاراپى مۇندا ق ح ر ەكسپورتتاۋشىلارى تىزبەسىنە ەنۋى ءتيىس شىعىس قازاقستاندىق كاسىپورىنداردىڭ جۇمىسىمەن تانىسۋ ءۇشىن كەلگەنىن اتادى.

«بىزگە مۇنداعى تەحنيكالىق تالاپتاردىڭ قالاي ورىندالاتىنىن، سانيتارلىق نورمالاردىڭ جاي-كۇيىن ءبىلۋ ماڭىزدى. ءونىمنىڭ قاۋىپسىزدىگىن قاداعالاۋ جۇيەسى جايىندا تەرەڭىرەك بىلگىمىز كەلەدى. بال ونىمدەرىن سەرتيفيكاتتاۋ ءۇشىن وندىرۋشىلەر قانداي ۇدەرىستەردەن وتەتىنىن، ءونىم ساپاسى قانداي كريتەرييلەر بويىنشا انىقتالاتىنىن ءتۇسىنۋىمىز قاجەت»، - دەدى دەلەگاتسيا مۇشەلەرى.

قىتاي تاراپى شىعىس قازاقستاننىڭ 10 كاسىپورنىنا ءوز ەلدەرىندە ءونىم ساتۋعا مۇمكىندىك بەرۋگە نيەتتى. ونىڭ التاۋى بال، ۇشەۋى بالىق، بىرەۋى ەت ونىمدەرىن شىعاراتىن كاسىپورىن بولۋى ءتيىس. شەتەلدىك دەلەگاتسيا مەن كوميتەت وكىلدەرى «پاسەكا» شارۋا قوجالىعى مەن «تورە توعام» ج ش س- ءنىڭ بازاسىندا بولىپ، بال جانە بالىق ونىمدەرىنىڭ وندىرىسىمەن تانىستى.

اۆتور: ەسىمجان ناقتىباي