قازاق كەلىنى بولۋدى ارماندايتىن ورىس قىزى
قالاداعى مەديتسينا ۋنيۆەرسيتەتىنىڭ 1 -كۋرس ستۋدەنتى ۇلتى ورىس بولسا دا، قازاق تىلىندە سايراپ تۇر. ول ءتىپتى اباي قۇنانباي ۇلى مەن مۇقاعالي ماقاتايەۆتىڭ ولەڭدەرىن جاتقا بىلەدى، دەپ حابارلايدى قازاقپارات ءتىلشىسى.
ديانا 2000 -جىلى شىعىس قازاقستان وبلىسى اياگوز اۋدانىندا دۇنيەگە كەلگەن. جاستايىنان قازاق بالالارىمەن بىرگە وسكەن ديانا قازاق ءتىلىن جان-جاقتى مەڭگەرۋگە تالپىنعانىن ايتادى. قازىردە ماقساتىنا قول جەتكىزگەن قىز قازاق، ورىس، اعىلشىن تىلدەرىن جەتىك مەڭگەرگەن.
«مەن قازاق ءتىلىن قازاق بالالارىمەن ويناپ ءجۇرىپ ۇيرەندىم جانە مۇنىمەن ماقتانامىن. ۇلتىمىز ورىس بولسا دا، اتا-انام مەنىڭ قازاق ءتىلىن جەتىك مەڭگەرسەم دەگەن نيەتىمدى قولدادى. سولاردىڭ ارقاسىندا جانە قازاق دوستارىمىنڭ ارقاسىندا وسى ءتىلدى ۇيرەندىم»، - دەيدى ديانا.
قازاق تىلىندەگى گازەت-جۋرنالدار مەن كىتاپتاردى ۇزبەي وقۋدى ادەتكە اينالدىرعان ديانا پوەزيانى ۇناتادى. اسىرەسە، اباي قۇنانباي ۇلى مەن مۇقاعالي ماقاتايەۆتىڭ ولەڭدەرىن جاتقا وقيدى. 8 -سىنىپتان بەرى اۋداندىق، وبلىستىق، رەسپۋبليكالىق دەڭگەيدەگى قازاق ءتىلى جانە ادەبيەت پاندەرىنەن وتكەن بايقاۋلاردان شەت قالماي، جۇلدەلى ورىندارعا يە بولىپ ءجۇر.
«سايىسقا قاتىسقان سايىن شىڭدالامىن» دەگەن ول تاياۋدا ۋنيۆەرسيتەت اتىنان ەتنوستار اراسىنداعى قازاق ءتىلى سايىسىندا باس جۇلدەنى العان. مەملەكەتتىك ءتىلدى ءبىلۋىنىڭ ارقاسىندا كوپ ىشىنەن توپ جارىپ جۇرگەن قىز سونىسىمەن ماقتانادى دا.
«نەگىزى بارلىق قازاق اقىندارىنىڭ ولەڭدەرىن وقيمىن. ءبىراق اباي اتامىز بەن مۇقاعالي ماقاتايەۆتىڭ ولەڭدەرى ەرەكشە ۇنايدى. مەكتەپ كەزىنەن باستاپ قازاق تىلىنەن وتەتىن بايقاۋلاردان شەت قالماۋعا تىرىسامىن. جاقىندا وسكەمەن قالاسىندا استانانىڭ 20 جىلدىعىنا وراي وزگە ۇلت وكىلدەرى اراسىندا قازاق تىلىنەن وبلىستىق بايقاۋ ءوتتى، 14 قاتىسۋشى بولدى. سولاردىڭ ىشىنەن ۇزدىك شىقتىم»، - دەيدى ول.
ديانانىڭ اتا-اناسى مەن باۋىرلارى دا مەملەكەتتىك تىلدە سويلەيدى. سوندىقتان قازاقتىڭ سالت- داستۇرلەرى، ادەپ-عۇرپىنا قۇرمەتپەن قاراپ، ۇلتتىق مەرەكەلەردى اتاۋسىز قالدىرمايتىنىن ايتادى. بولاشاقتا بويجەتكەن قازاق جىگىتىنىڭ جارى بولۋدى ارماندايدى.
اۆتور: باعىم عالىمبەك قىزى
