كونە سىعاناق قالاسى ەتنوتۋريزم ورتالىعىنا اينالادى

قىزىلوردا. قازاقپارات - قىزىلوردا وبلىسىنىڭ جاڭاقورعان اۋدانى اۋماعىندا ورىن تەپكەن سىعاناق قالاشىعىندا ارحەولوگيالىق جۇمىستار قولعا الىنىپ جاتىر، دەپ حابارلايدى قازاقپارات ءتىلشىسى.

كونە قالا ورنىنداعى ارحەولوگيالىق جۇمىستار بيىل دا جالعاسىن تاۋىپ وتىر. قازىرگى كۇنى بۇل اۋقىمدى ءىستى تۇركىستان قالاسىنداعى قوجا احمەت ياسساۋي اتىنداعى ارحەولوگيالىق عىلىمي-زەرتتەۋ ورتالىعى جۇرگىزىپ كەلەدى. ال قايتا قالپىنا كەلتىرۋ شارالارى «قاز قايتا جاڭعىرتۋ» ر م ك مەكەمەسىنە جۇكتەلگەن.

قىزىلوردا وبلىسىنىڭ تاريحي جانە مادەني ەسكەرتكىشتەردى قورعاۋ ورتالىعىنىڭ ديرەكتورى ساپار كوزەيبايەۆتىڭ ايتۋىنشا، قالاشىقتىڭ شىعىس قاقپاسى بۇرىنعى قالپىنا كەلتىرىلەدى.

«ەسكەرتكىشتى قالپىنا كەلتىرۋ جۇمىسى ءۇش كەزەڭنەن تۇرادى. بيىل ءساۋىر ايىندا باستالىپ، تامىز ايىنا دەيىن جالعاساتىن بولادى. نىساندى قالپىنا كەلتىرۋ جۇمىستارىنا 30 عا جۋىق ادام تارتىلدى، قارجىلاندىرۋ رەسپۋبليكالىق جانە جەرگىلىكتى بيۋجەت ەسەبىنەن جۇرگىزىلىپ جاتىر»، - دەدى س. كوزەيبايەۆ.

اۋدانعا جاساعان ساپارى بارىسىندا قالاداعى قازبا جۇمىسى بارىسىمەن تانىسقان وبلىس اكىمى قىرىمبەك كوشەربايەۆ ارحەولوگتارمەن جۇزدەسىپ، سىعاناق قالاشىعى جان-جاقتان تۋريستەردى تارتاتىن تاريحي-مادەني ورتالىققا اينالۋى ءتيىس ەكەنىن اتاپ ءوتتى.

قىزىلوردا وبلىسىندا ورنالاسقان سىعاناق، شىرىك-رابات، جانكەنت قالاشىقتارى سەكىلدى ەجەلگى تۇركى تايپالارىنىڭ استانالارىن قالپىنا كەلتىرىپ، ولارعا قاجەتتى سەرۆيستىك ينفراقۇرىلىمدى جۇرگىزىپ، تۋريستىك كلاستەر جاسالاتىن بولادى.

عالىمداردىڭ زەرتتەۋىنشە، تابىلعان زاتتارعا قاراعاندا سىعاناقتا VI- XVIII عاسىرلاردا تىرشىلىك قايناپ تۇرعان. ەرتە كەزدەگى تاريحشىلار سىعاناقتى «قىپشاق دالاسىنىڭ گاۆانى» دەپ تە اتاعان. بۇل قالا قىپشاق مەملەكەتىنىڭ ساۋدا جانە ساياسي ورتالىعى بولعان. جوشى ۇرپاقتارى كەزىندە سىعاناق اق وردانىڭ ورتالىعى بولىپ، وندا تەڭگە سوعىلعان دەگەن دەرەكتەر ايتىلادى.