تارازدىق فوتوءتىلشى تۋرالى فيلم حالىقارالىق فەستيۆالدە جۇلدەگە ىلىكتى
رەجيسسەر سەرگەي الەكساندروۆتىڭ 26 مينۋتتىق «جالعىز جيھانگەز» فيلمى «ەكولوگيالىق قىلمىس» نوميناتسياسى - ەكولوگيا سالاسىنداعى قىلمىستارعا قارسى كۇرەس تاقىرىبىندا جۇلدەگەر اتاندى.
ەسكە سالا كەتەيىك، سەرگەي الەكساندروۆ - ەكى مىڭىنشى جىلداردىڭ باسىندا تارازدان ساماراعا كوشىپ كەتىپ، رەسەيلىك تانىمال كينودوكۋمەنتاليست اتانعان وتانداسىمىز. ول «گۋبەرنيا» اتتى سامارا وبلىستىڭ تەلەارناسىندا «اق جول» ستۋدياسىندا تەلەوپەراتور بولىپ ەڭبەك ەتەدى. بىرنەشە حالىقارالىق بايقاۋلاردىڭ جەڭىمپازى اتانعان «ناۋرىز»، «بەتاشار» اتتى دەرەكتى فيلمدەردىڭ اۆتورى.
«دەتەكتيۆفەست ⅹⅹحالىقارالىق كينوفەستيۆالى اياقتالدى! حالىقارالىق كينوفەستيۆالدەردىڭ سسەناريى بويىنشا، ەڭ ماڭىزدى نوميناتسيالار مەن سىيلىقتار سالتاناتتى شارانىڭ سوڭىندا تابىستالادى. حالىقارالىق رەگلامەنتتەر ەرەجەسىن كينوفەستيۆالدىڭ پرەزيدەنتى يۋريي ميتيۋشين بۇزعان جوق. فەستيۆالدىڭ «جالعىز جيھانگەز» اتتى قازاق- ورىس فيلمىنىڭ ماراپاتتالۋىمەن اياقتالعانى ءتىپتى قۋانتادى. كورەرمەندەردىڭ قوشەمەتىمەن كينوفەستيۆال پرەزيدەنتى ءفيلمنىڭ رەداكتورى ۆياچەسلاۆ كۋبيتسكييگە ديپلومدى تابىس ەتتى» - دەدى قازاقپارات تىلشىسىنە سەرگەي الەكساندروۆ.
23 - ساۋىردە اشىلعان DetectiveFEST حالىقارالىق فەستيۆالىنە الەمنىڭ 71 ەلىنەن 600-گە جۋىق فيلم كەلىپ تۇسكەن. فەستيۆال ەكى بولىكتەن: قوعامنىڭ ەڭ وزەكتى ماسەلەسىن ارقاۋ ەتكەن جانرلىق نوميناتسيا مەن ارنايى (تاقىرىپتىق) نوميناتسيادان تۇرادى.
«ەكولوگيالىق قىلمىس» نوميناتسياسىنا سەگىز كينوتۋىندى ۇسىنىلىپ، ونىڭ ىشىندە تاعى ءبىر قازاقستاندىق فيلم - «مەنىمەن بىرگە تىنىس ال» اتتى فيلمى تانىستىرىلعان بولاتىن. سونىمەن قاتار، «سوعىس جانە بەيبىتشىلىك» نوميناتسياسى بويىنشا (اسكەري قىزمەت پەن اسكەري بورىش تۋرالى» قازاقستان تاراپىنان «تەررور اناتومياسى» (اناتوميا تەررورا) ) ۇسىنىلسا، ال «قىلمىستىق تاجىريبە» نوميناتسياسىندا (مەديتسينا سالاسىنداعى قىلمىسپەن كۇرەس) كورەرمەندەر «سىرقاتتىڭ تاريحى» اتتى تاعى ءبىر قازاقستاندىق فيلمدى تاماشالادى.
سەرگەي الەكساندروۆ ءوزىنىڭ «جالعىز جيھانگەز» كينوتۋىندىسىندا جامبىل وبلىستىق «زناميا ترۋدا» گازەتىنىڭ ءفوتوتىلشىسى ۆالەريي سۋتۋلوۆ تۋرالى باياندايدى. ءفوتوتىلشى تابيعاتقا دەگەن شەكسىز ماحابباتىن جۇمىسىمەن دالەلدەپ، «قازاقستاننىڭ تابيعاتى» اتتى فوتوالبومدى جارىققا شىعارعان. قۇستاردىڭ ۇشىپ بارا جاتقان ءبىر عانا كادرى ءۇشىن ونىڭ قامىستىڭ تۇبىندە ءبىر ءتۇن بويى وتىرعان كەزدەرى بولعان ەكەن. ال جامبىل ءوڭىرىنىڭ اسپانىنان ۇشىپ بارا جاتقان تىرنالاردى فوتوسۋرەتكە ءىلۋ ءۇشىن ءشول دالانى كەزگەن كەزدەرى دە بار.
ۆالەريي يۆانوۆيچ جامبىل ءوڭىرىنىڭ تۇكپىر- تۇكپىرىن ارالاپ، وزىندەي ادامداردى تابيعاتقا عاشىق ەتە بىلگەن جان. ونىڭ تابيعاتقا دەگەن شەكسىز قۇرمەتى - ءاربىر تۋىندىسىندا ايقىن كورىنەدى. 2008 -جىلى ول 60 جاسقا تولۋىنا التى اي قالعاندا ومىردەن وتكەن. سوڭىنا قالدىرعان مۇراسى بۇگىن ۇرپاققا قىزمەت ەتىپ جاتىر.
اۋدارما: ايان بەكەن ۇلى
