بەلگىلى تەلەجۇرگىزۋشى: بالا تۋىپ الۋ تۋرالى ويلانىپ ءجۇرمىن

استانا. قازاقپارات - تانىمال تەلەجۇرگىزۋشى ەلۆيرا ەرعالينا قازاق قوعامىنداعى «وتىرىپ قالعان» قىزدار ماسەلەسىن قوزعادى.

ايتۋىنشا، تەڭىن تابا الماي، قارتايعانشا جالعىز جۇرگەن ايەلدەردىڭ كەيبىرىندە «كەزىندە نەگە بالا تۋىپ المادىم ەكەن؟» دەگەن وكىنىش بولارى ءسوزسىز، دەپ حابارلايدى Stan.kz.

بۇل تۋرالى ول Instagram جەلىسىندەگى پاراقشاسىندا جازدى.

ەلۆيرا ەرعالينانىڭ سوزىنشە، تۇرمىس قۇرۋعا مۇمكىندىك قالماي، جۇبىڭىزدى تاپپاساڭىز، دەنساۋلىقتىڭ مۇمكىندىگى باردا، ەشكىمنىڭ سوزىنە قاراماستان بالالى بولعان دۇرىس سەكىلدى.

«سوڭعى كەزدەرى بالا تۋىپ الۋ تۋرالى ويلانىپ ءجۇرمىن... قوعام قانشا تاس لاقتىرىپ، ەسەككە تەرىس مىنگىزىپ الاستاتاتىن ءىس بولسا دا، وسى تاقىرىپتى قوزعاعىم كەپ وتىر. بۇل جازبام ارقىلى ەشكىمنىڭ جان جاراسىنا ءتيىسىپ نە اۋديتوريامدى ۇگىتتەپ جاتپاعانىمدى، ازاماتتىق پىكىرىمدى جازعانىمدى ەسكەرتە كەتەيىن. بەلگىلى-بەلگىسىز سەبەپتەرمەن تۇرمىس قۇرماي قالعان، جالعىز قالىپ قويعان، جەسىر نە اجىراسقان قىزدار كوپ بىزدە. «تەڭىمدى تابارمىن» دەگەن ۇمىتپەن جۇرەدى داعى، 50-60 جاسقا كەلگەندە جالعىز ءوزى كۇن كەشەدى. نە كۇيەۋ جوق، نە بالا جوق. بىرەۋىنىڭ بولماسا دا، بىرەۋىنىڭ كوكەيىندە «كەزىندە نەگە بالا تۋىپ المادىم ەكەن؟» دەگەن وكىنىش بولارى ءسوزسىز. تۇرمىس قۇرۋعا مۇمكىندىك قالماي، جۇبىڭدى تاپپايتىنىڭا كوزىڭ جەتتى مە، دەنساۋلىقتىڭ مۇمكىندىگى باردا ەشكىمنىڭ سوزىنە قاراماستان بالالى بولعان دۇرىس سەكىلدى. ءوزىڭ ءۇشىن. تىرشىلىگىڭدى جالعاۋ ءۇشىن. جالعىز قالماس ءۇشىن.

مەيلى، قوعام، تۋىس، تانىس، بۇكىل الەم «كۇيەۋگە شىقپاي بالالى بولىپتى» دەسىن. مەيلى، وسەك-اياڭ، سىپسىڭ سوزبەن تالقىلاسىن. مەيلى، كەيبىرەۋى تەرىس اينالسىن. مەيلى! ءوز عۇمىرىڭنىڭ مەرەكەسى ءۇشىن بالا كەرەك. جەردەن الىپ، جەرگە سالاتىن، كۇيەۋگە شىقپاي، بالالى بولۋىڭا قارسى جاننىڭ ءبارى ەرتەڭ قارتايعاندا جانىڭدا بولمايدى. ءتۇبى جالعىز قالاسىڭ»، - دەيدى تەلەجۇرگىزۋشى.

ەرعالينانىڭ ايتۋىنشا، قوعامدا ماتەريالدىق جاعدايى ءبۇتىن، جانى جارتى، قاسىندا ەشكىمى جوق، تۋعان-تۋىس، قۇدا-جەكجاتتىڭ ءسوزى ءۇشىن، ەلدەن ۇيات بولماسىن دەپ، ءومىرىن وزگەنىڭ ءسوزى ءۇشىن قۇربان ەتىپ جۇرگەندەر كوپ.

«استاناعا العاش كەلگەن جىلدارى، مەرەي كۇيەۋگە شىعىپ كەتكەسىن كۆارتيرادا قازاق ايەلمەن تۇردىم، ءبىر بولمەسىن جالداعام. ءۇيى، جۇمىسى بار. ءوزى جالعىزباستى. كۇيەۋگە شىقپاعان. جاسى ەلۋگە جاقىنداعان. ءومىرى تەك جۇمىس پەن ءۇيدىڭ اراسىندا ءوتىپ جاتتى، ەش قىزىق جوق. ارالاساتىن ورتاسى جوعىن ايتاتىن. «الام دەگەن جىگىت بولسا، كەتە بەر» دەيتىن. بالالى بولماعانىنا وكىنەتىن.

ماتەريالدىق جاعدايى ءبۇتىن، جانى جارتى، قاسىندا ەشكىمى جوق، تۋعان-تۋىس، قۇدا-جەكجاتتىڭ ءسوزى ءۇشىن، ەلدەن ۇيات بولماسىن دەپ، ءومىرىن وزگەنىڭ ءسوزى ءۇشىن قۇربان ەتىپ جۇرگەندەر كوپ. «ۇيات»- تى ورىندى-ورىنسىز جالاۋ قىپ ۇستاماس بۇرىن ەرتەڭگە دە باعدارمەن قاراعان دۇرىس سەكىلدى. ءسىز قالاي ويلايسىز؟

مەنىڭ قىزىم بار. ەكىنشى بالانى دا جوسپارلارمىن، كۇيەۋگە شىققاندا مۇمكىندىك بولماي جاتسا، تۋىپ الارمىن»، -  دەيدى ەلۆيرا ەرعالينا.