وزبەكستان پرەزيدەنتى مينيسترلەردى اۋىلدارعا جىبەرمەك

استانا. قازاقپارات - وزبەكستان پرەزيدەنتى شاۆكات ميرزيايەۆ تاشكەنتتە وتىرعان مينيسترلەردى «حالىقتىڭ كۇندەلىكتى كۇنكورىسىمەن تانىسىپ، قيىندىقتارىن كورۋ ءۇشىن» اۋىل- ايماقتارعا جىبەرەتىنىن ايتتى.

«تاشكەنتتە تۇرىپ جاتقان 70 پايىز مينيستر مەن شەنەۋنىك ەندى پروۆينتسيالارعا بارىپ تۇرادى. ولار تاشكەنتتە قالمايدى» دەدى 26 - ساۋىردە وتكەن ۇكىمەت وتىرىسىندا.

«تەلەديداردان حالىقتىڭ سۋسىز، گازسىز، جارىقسىز وتىرعانىن كورەمىز. 32 ميلليون حالىقتىڭ ەكى جارىم ميلليونى تاشكەنتتە تۇرادى. قالعان ادامدار باسقا ايماقتاردا ءومىر ءسۇرىپ جاتىر» دەدى پرەزيدەنت.

ميرزيايەۆ اۋىلدارعا قاي مينيسترلەردىڭ اتتاناتىنىن، ولاردىڭ باسقا ايماقتاردا قانشا ۋاقىت بولاتىنىن ناقتى ايتپادى. تەك «بۇل ماسەلەگە قاتىستى جاقىندا پرەزيدەنت جارلىعى شىعادى» دەدى.

وتكەن اپتالاردىڭ بىرىندە ميرزيايەۆ مۇعالىمدەر مەن دارىگەرلەردى «مىندەتىنەن تىس جۇمىسقا شىعارعان» شەنەۋنىكتەر جۇمىستان قۋىلاتىنىن ايتقان.

www.azattyq.org