وڭتۇستىك پەن سولتۇستىك كورەيا ءبىرىنشى حانىمدارىنىڭ كەزدەسۋى الەمدىك ب ا ق نازارىن اۋداردى
ەكى مەملەكەتتىڭ ءبىرىنشى حانىمدارى مۇنداي كەزدەسۋدى تۇڭعىش رەت وتكىزىپ وتىر، - دەپ حابارلايدى Yonhap.
لي سول چجۋ مەن كيم چجون سۋك جىلى لەبىز تانىتىپ، قول الىستى. وسىدان كەيىن كۇيەۋلەرىمەن بىرگە سۋرەتكە ءتۇسىپ، بانكەتكە باردى. ك ح د ر ليدەرىنىڭ ايەلى كەزدەسۋگە قويۋ سارى- قىزعىلت ءتۇستى باتىس ۇلگىسىندەگى كوستيۋم تاڭداپتى. ال وڭتۇستىك كورەيالىق پرەزيدەنتتىڭ 62 جاستاعى ايەلى كۇلگىن تانامونشاعى بار اشىق كوك ءتۇستى پالتو كيىپتى. لي سول چجۋ شەتەلدىك ليدەرلەرمەن قارىم-قاتىناس تاجىريبەسى بولماسا دا ءوزىن ەركىن ۇستاپ، سەنىمدى كورىندى. تاريحي وقيعانىڭ كادرلارىن الەمدىك ب ا ق تاراتىپ جاتىر.
مۇنىڭ الدىندا ك ح د ر جانە كورەيا رەسپۋبليكاسىنىڭ باسشىلارى كيم چەن ىن جانە مۋن چجە ين ەكى ەل اراسىنداعى دەماركاتسيالىق ايماقتا ورنالاسقان پحانمۋندجوم كەلىسىم ورنىنا كەلىپ، قول الىسقان ەدى. كيم چەن ىن ك ح د ر دەلەگاتسياسى «بەيبىتشىلىك پەن گۇلدەنۋ جولىنداعى جاڭا تاريحى باستالعانداي سەزىمدە» كەلگەنىن ايتتى. ءوز كەزەگىندە مۋن چجە ين سولتۇستىك كورەيا باسشىسىن كەلىسىمگە كەلۋگە شاقىردى.
«اشىق ديالوگ جۇرگىزسەك، ۇلتىمىزعا جانە بەيبىتشىلىككە ۇمتىلعان بۇكىل الەم حالقىنا ۇلكەن سىي جاسايمىز»، - دەدى ول. كيم چەن ىن وڭتۇستىك كورەيامەن شەكارانى كەسىپ ءوتىپ، 65 جىلدا مۇنداي قادامعا بارعان ق ح د ر-دىڭ العاشقى باسشىسى بولىپ وتىر.
Kaz.tengrinews.kz
