نيۋ-يوركتە پروموۋتەرى ورىسشا ءسوز باستاعان دانيار ەلەۋسىنوۆتەن قازاقشا سويلەۋىن ءوتىندى

استانا. قازاقپارات - وليمپيادا چەمپيونى دانيار ەلەۋسىنوۆ نيۋ-يوركتە وتكەن باسپا ءسوز ءماسليحاتىنا قاتىستى.

28 -ءساۋىر كۇنى ول كاسىبي بوكستاعى العاشقى جەكپە-جەگىن وتكىزەدى.

باسپا ءسوز ءماسليحاتىن دانيار ەلەۋسىنوۆتىڭ پروموۋتەرى ەددي حيرن جۇرگىزدى. ول الدىمەن قازاقستاندىق بوكسشىنى تانىستىردى. ودان كەيىن قازاقستاندىق بوكسشىعا ءسوز بەردى. ەلەۋسىنوۆ ءوز ريزاشىلىعىن اعىلشىن تىلىندە جەتكىزدى. ەددي حيرن بولسا، تاعى قازاقشا تىلەك ءبىلدىرۋدى ءوتىندى. وسى كەزدە دانيار ءسال ساسىپ قالىپ، ورىسشا سويلەي باستادى. ءبىراق جانىندا تۇرعان اۋدارماشى وعان قازاق تىلىندە سويلەۋ كەرەكتىگىن ءتۇسىندىردى.

«مەن وتە قۋانىشتىمىن. بۇگىن باسپا ءسوز ءماسليحاتى ءوتىپ جاتىر. ەرتەڭ، سەنبى كۇنى ءبىرىنشى جەكپە-جەگىمە شىعامىن. بۇكىل قازاق حالقىن قۋانتىپ، جەڭىسكە جەتەمىن دەپ ۇمىتتەنەمىن. الەم چەمپيونى بولسام دەيمىن. بارلىقتارىڭىزعا راقمەت! جانكۇيەر بولىڭىزدار!»، - دەدى د. ەلەۋسىنوۆ.

ايتا كەتەيىك، دانيار ەلەۋسىنوۆتىڭ قارسىلاسى - امەريكالىق نوا كيدد. ولاردىڭ جەكپە-جەگى دەنيەلا دجەيكوبس مەن ماتسەي سۋلەتسكي اراسىنداعى ايقاستىڭ اندەركارتىندا وتەدى. بوكس كەشى Barclays ارەنادا بولادى.