قىزمەت كولىگىن جەكە ماقساتقا پايدالانعان اكىم جازالاندى - اقتوبە وبلىسى
ق ر مەملەكەتتىك ىستەر جانە سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتى، ادەپ كەڭەسى بۇگىن حازرەت اۋىلىنىڭ اكىمى مەيىرحان دۇيسەنوۆكە قاتىستى تارتىپتىك ءىستى قارادى. دەپارتامەنتتەگى باسقارمانىڭ باس مامانى ءسانىم قۋانتايەۆانىڭ ايتۋىنشا، اۋىل تۇرعىنى اكىمىنىڭ ۇستىنەن ارىز تۇسىرگەن.
«مارتوك اۋدانىنىڭ تۇرعىنى قونىسباي ءادىلوۆ ارىز جازىپ، تەكسەرۋ جوسپاردان تىس جۇرگىزىلدى. ارىزدا حازرەت اۋىلدىق وكرۋگىنىڭ اكىمى مەيىرحان دۇيسەنوۆتىڭ قىزمەتتىك كولىكتى ءوز قاجەتتىلىگىنە پايدالانىپ، بيۋدجەتتىك مەكەمەگە تيەسىلى كومىردى يەمدەنگەنىن جازعان. تەكسەرۋ كەزىندە اكىمنەن، ارىزدانۋشىدان جازباشا تۇسىنىكتەمە الىندى. اۋىل اكىمى ءوز تۇسىنىكتەمەسىندە جەكە كولىگى بۇزىلعان كەزدە قىزمەتتىك كولىگىمەن وبلىس ورتالىعىنا بارعانىن جاسىلمادى. ول وتباسىمەن قالاعا بارعان. بۇل ءىسى الەۋمەتتىك جەلىگە جاريالانىپ، قوعام تاراپىنان سىنعا ىلىكتى. ءارى اكىمدىكتە 11 جىلدان بەرى كۇزەتشى بولىپ جۇمىس ىستەيتىن داۆلەتوۆا ءوز تۇسىنىكتەمەسىندە اكىمنىڭ قىزمەتتىك كولىكتى تۇراقتى جەكە ماقساتقا پايدالانىپ، اۋلاسىنداعى قوقىستاردى شىعاراتىنىن جازدى»، - دەدى دەپارتامەنتتەگى باسقارمانىڭ باس مامانى ءسانىم قۋانتايەۆ.
ادەپ كەڭەسىنە كەلگەن حازرەت اۋىلىنىڭ اكىمى مەيىرحان دۇيسەنوۆ جەكە كولىگى بۇزىلعان كەزدە قىزمەتتىك كولىكتى پايدالانعانىن جاسىرمادى. ءارى بۇل ءىسىنىڭ قايتالانبايتىنىن جەتكىزدى.
«قوقىس تاسىدى دەگەن سوزگە كەلىسپەيمىن. سەنبىلىك كەزىندە كولىككە تىركەمە تىركەپ، قوقىس شىعارامىز. ول جەكە ەمەس، اۋىلدىڭ قوقىسى. ءبىراق كولىگىم بۇزىلعان كەزدە قىزمەتتىك ماشينانى پايدالانعانىم راس»، - دەدى اۋىل اكىمى.
ادەپ كەڭەسى سوگىس بەرۋدى ۇسىندى. كەڭەس مۇشەلەرى ءبىراۋىزدان قولدادى.
