وڭتۇستىك قازاقستان وبلىسىنىڭ اكىمى قىتايمەن تۋريزم سالاسىنداعى ىنتىماقتاستىقتى تالقىلادى

شىمكەنت. قازاقپارات - وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ قىتاي حالىق رەسپۋبليكاسىنىڭ الماتىداعى باس كونسۋلى جاڭ ۆەي مىرزا باستاعان قىتايلىق كونسۋلدىق وكىلدەرىمەن كەزدەستى، دەپ حابارلايدى قازاقپارات ءتىلشىسى.

تاراپتار كەزدەسۋ بارىسىندا ەكى ەل اراسىنداعى ساۋدا- ەكونوميكالىق، مادەني- گۋمانيتارلىق جانە تۋريزم سالاسىنداعى ىنتىماقتاستىقتىڭ پەرسپەكتيۆالى باعىتتارىن كەڭەيتۋ ماسەلەلەرىن تالقىلادى.

ءوز كەزىندە وبلىس اكىمى ءوڭىردىڭ الەۋمەتتىك- ەكونوميكالىق دامۋ جاعدايى، بولاشاقتاعى دامۋ مۇمكىندىكتەرى مەن قولعا الىنىپ جاتقان ىرگەلى جوبالار تۋرالى باياندادى. قازاقستان مەن قىتاي اراسىندا ستراتەگيالىق سەرىكتەستىك پەن ءتۇرلى سالالاردا تىعىز قارىم- قاتىناس ورناعانىن ايتقان وبلىس اكىمى شيرەك عاسىردا ەكى مەملەكەتتىڭ سەنىمدى جانە مازمۇندى ديالوگى ورناتىلعانىن جەتكىزدى.

«بۇگىندە ەكى ەلدىڭ ەكونوميكالىق ىنتىماقتاستىعى ايتارلىقتاي العا جىلجىپ، قوس ەلدىڭ اراسىنداعى قارىم- قاتىناس نىعايا ءتۇستى. ماسەلەن، قازاقستان مەن قىتاي اراسىنداعى يندۋستريالاندىرۋ جانە ينۆەستيتسيالار سالاسىنداعى ىنتىماقتاستىق تۋرالى كەلىسىمنىڭ شەڭبەرىندە ەلىمىزدە 51 جوبا جۇزەگە اسىرىلۋدا»، - دەدى ايماق باسشىسى.

اكىم سونىمەن قاتار وڭتۇستىك قازاقستان وبلىسى مەن قىتايدىڭ وڭىرلەرى اراسىنداعى ءوزارا ءتيىمدى ساۋدا- ەكونوميكالىق جانە ينۆەستيتسيالىق ىنتىماقتاستىقتى دامىتۋعا زور مۇمكىندىكتەر بار ەكەنىنە سەنىم ءبىلدىرىپ، اۋىل شارۋاشىلىعى مەن ونەركاسىپ جانە تۋريزم سالاسىندا ارىپتەستىك بايلانىستى دامىتۋعا دايىن ەكەنىن جەتكىزدى.

ال، باس كونسۋل بۇل وڭتۇستىك وڭىرىنە جاساعان ءتورتىنشى ساپارى ەكەنىن ايتا كەلە وبلىستىڭ بارلىق باعىتتار بويىنشا دامىپ جاتقانىنا كۋا ەكەنىن ايتتى.

«وڭتۇستىك قازاقستان ەلدەگى كوپتەگەن كورسەتكىشتەر بويىنشا كوش ىلگەرى ەكەندىگىن ءبارى بىلەدى. مۇندا ينۆەستورلار ءۇشىن قولايلى جاعداي جاسالعان. سوندىقتاندا ەكى تاراپتىڭ مۇددەلەرىنە ساي كەلەتىن ءبىرقاتار ۇسىنىستاردى جەتكىزسەم دەيمىن. ماسەلەن، اۋىل شارۋاشىلىعى ونىمدەرى مەن ازىق- تۇلىك ونىمدەرىن قايتا وڭدەۋ سالاسى مەن تۇرمىستىق قالدىقتاردى قايتا وڭدەۋ، ەنەرگيا كوزدەرىن دامىتۋ جانە قالالىق جانە نارىقتىق ينفراقۇرىلىم قۇرىلىسى اياسىنداعى ىنتىماقتاستىقتى كەڭەيتۋ»، - دەدى جاڭ ۆەي.

وبلىس اكىمى جالپى ەكى تاراپتىڭ دا الەۋمەتتىك- ەكونوميكالىق دامۋى تۇرعىسىنان ءوز تيىمدىلىگىن كورسەتەتىن بۇل ۇسىنىستاردى قولدايتىندىعىن ايتىپ، ەكى ەلدىڭ مەملەكەت باسشىلارىنىڭ باستاماسىمەن قولعا الىنعان «نۇرلى جول» باعدارلاماسى مەن «جىبەك جولىن» جاڭعىرتۋ جوبالارىن ساپالى ورىنداۋ باعىتىندا ىنتىماقتاسا جۇمىس ىستەۋگە نيەت ءبىلدىردى.

اۆتور: اينۇر اقبايەۆا