وڭتۇستىك كورەيا مەن سولتۇستىك كورەيا بىتىمگە كەلدى

استانا. قازاقپارات - وڭتۇستىك جانە سولتۇستىك كورەيا كوشباسشىلارىنىڭ جۇما كۇنگى تاريحي سامميتىنىڭ باستى ناتيجەسى كورەيا تۇبەگىنىڭ بىرىگۋى مەن بەيبىتشىلىك تۋرالى بىرلەسكەن دەكلاراتسياعا قول قويۋى بولىپ وتىر، دەپ حابارلايدى ريەنحاپ.

بىرلەسكەن پحانمۋندجوم دەكلاراتسياسىندا وڭتۇستىك كورەيا پرەزيدەنتى مۋن چجە ين مەن سولتۇستىك كورەيالىق كوشباسشى كيم چەن ىن كورەي تۇبەگىندەگى يادرولىق قارۋسىزدانۋ پروتسەسى - تاراپتاردىڭ ورتاق ماقساتى ەكەنىن اتاپ وتكەن.

دەكلاراتسيادا وڭتۇستىك جانە سولتۇستىك كورەيا اراسىندا جەردەگى، تەڭىزدەگى جانە اۋەدەگى بارلىق جاۋلاسۋ ارەكەتتەرىنىڭ توقتاتىلاتىنى ايتىلعان جانە دەميليتاريزاتسيالانعان ايماقتى بەيبىتشىلىك ايماعىنا اينالدىرۋ باستاماسى كوتەرىلگەن.

تاراپتار وڭتۇستىك كورەيا، سولتۇستىك كورەيا جانە ا ق ش اراسىنداعى ءۇش جاقتى كەلىسسوزدەر جۇرگىزۋگە كۇش سالۋعا ۋاعدالاستى. سونىمەن بىرگە، قىتاي مەملەكەتى قوسىلاتىن كەلىسسوزدەردىڭ ءتورتجاقتى فورماتى بولۋى مۇمكىن ەكەندىگى دە ەسكەرىلدى. اتالعان كەلىسسوزدەر ماقساتى - كورەي سوعىسىنىڭ (1950-1953 -جىلدار) اياقتالۋى مەن كورەي تۇبەگىندە مىزعىماس بەيبىتشىلىك ورناتۋ.

دەكلاراتسيانىڭ ەڭ ماڭىزدى ءارى ەڭ اسەرلى بولىمدەرىنىڭ ءبىرى كورەي سوعىسىندا ءبىر- بىرىنەن كوز جازىپ قالعان تۋىستاردىڭ تابىسۋى بولىپ وتىر. وڭتۇستىك جانە سولتۇستىك كورەيادا تۇرىپ كەلگەن تۋىستار ءبىر- بىرىمەن 15 - تامىز كۇنى كەزدەسەدى.

ودان بولەك، وڭتۇستىك جانە سولتۇستىك كورەيا قورعانىس مينيسترلىكتەرى اراسىندا تۇراقتى كەلىسسوزدەر جۇرگىزىپ تۇرۋعا ۋاعدالاستى. دەكلاراتسياعا سايكەس، العاشقى كەزدەسۋ مامىر ايىندا وتەدى.

سونىمەن بىرگە، قوس مەملەكەت شەكارا ماڭىنداعى كەسون قالاسىندا بىرلەسكەن بايلانىس بەكەتىن اشۋدى ۇيعاردى. بۇل بەكەت ىنتىماقتاستىق جانە گۋمانيتارلىق ماسەلەلەر بويىنشا جۇمىس ىستەمەك.

ەكى ەلدىڭ تەمىرجولدارىن جالعاۋ بويىنشا دا ناقتى قادامدار جاسالادى.

اۋدارما: ايجان سەرىكجان قىزى