يۋنەسكو «ەدىگە باتىر» ەپوسىن مەكتەپ باعدارلاماسىنا ەنگىزۋدى ۇسىندى
اقتوبەدە «ەر ەدىگە جانە 21 - عاسىرداعى ۇلتتىق سانا» حالىقارالىق كونفەرەنسياسى ءوتتى. كونفەرەنسياعا رەسەي، وزبەكستان، باشقۇرتستان، موڭعوليا، قاراشاي- شەركەش ەلدەرىنىڭ عالىمدارى، ىزدەنۋشىلەرى، تاريحشىلار مەن ادەبيەت قايراتكەرلەرى قاتىستى. يۋنەسكو جاھاندىق گەوپاركى بويىنشا ۇلتتىق كوميتەتىنىڭ وكىلى مەكتەپ باعدارلاماسىنا «ەدىگە باتىر» ەپوسىن ەنگىزۋدى سۇرادى.
«ەپوستىڭ نوعاي، قاراقالپاق تىلىندەگى نۇسقالارى تەك ورىس تىلىنە عانا ەمەس، اعىلشىن تىلىنە دە اۋدارىلۋى دۇنيەءجۇزى ادەبيەتتانۋشىلارىنىڭ نازارىن اۋدارىپ وتىر. ياعني، «ەدىگە باتىر» تاريحي- قاھارماندىق ەپوسى قازىرگى كۇنى اعىلشىن ءتىلى ارقىلى الەمگە تانىلۋدا. ەپوستىڭ قاراقالپاقشا نۇسقاسى ورتا مەكتەپتەردە وقىتىلىپ جاتقانىنان دا حاباردارمىز. ءبىز وسى كونفەرەنسيادان كەيىن «الپامىس باتىر»، «قوبىلاندى باتىر» جىرلارى سياقتى «ەدىگە باتىر» ەپوسى دا قازاقستانداعى ورتا مەكتەپ باعدارلاماسىنا ەنەدى دەپ ۇمىتتەنەمىز»، - دەدى يۋنەسكو جاھاندىق گەوپاركى بويىنشا ۇلتتىق كوميتەتىنىڭ وكىلى ازات ەرىمبەتوۆ.
بيىل اقتوبە قالاسىندا ەدىگە باتىرعا كوشە اتى بەرىلىپ، ەسكەرتكىش ورناتىلادى. اقتوبەنىڭ ءسۇت زاۋىتى اۋدانىنداعى زينچەنكو كوشەسىن ەدىگە باتىر ەتىپ وزگەرتۋ ۇسىنىسىنا رەسپۋبليكالىق ونوماستيكالىق كوميسسيا رۇقسات بەردى.
«2016-2017 -جىلدارى ارالىعىندا اقتوبە وبلىسى، مارتوك اۋدانى، ءۇش بورتە دەگەن جەرىندە بەلگىتاس قويىلدى. بيىل اقتوبە قالاسىندا ەدىگە باتىرعا كوشە اتى بەرىلىپ، ەسكەرتكىش ورناتىلادى. بايعانين اۋدانىنداعى «ەدىگەنىڭ جالى»، ساعىز وزەنى بويىنداعى اكە- شەشەسىنىڭ بەيىتى، ەدىگە دەگەن جەر اتاۋى تاريحي دالەل بولىپ وتىر. ءبىز ەدىگە باتىردى قازاق جۇرتشىلىعى بولىپ ۇلىقتاۋدى قاجەت ەتەتىن تۇلعا دەپ ەسەپتەيمىز. جۇمىس ءارى قاراي جالعاسادى»، - دەدى اقتوبە وبلىستىق ىشكى ساياسات باسقارماسىنىڭ باسشىسى بۇلبۇل ەلەۋسىنوۆا.
اۆتور: التىناي ساعىندىقوۆا
