وزىڭىزگە دەگەن سەنىمسىزدىك نەدەن تۋادى؟
بۇگىن وسى تاقىرىپ اياسىندا بىرنەشە كەڭەس ۇسىنامىز:
وتكەن كۇننىڭ قاتەلىكتەرى: ءبىر عانا قاتەلىك ادامنىڭ وزىنە دەگەن قارىم- قاتىناسىن تۇبەگەيلى وزگەرتە الادى. دەگەنمەن، وتكەندى وزگەرتۋ مۇمكىن ەمەس. قاتەلىككە بولا مويىماي، ونىڭ ورنىنا ونى بولاشاقتا قايتالامايتىن ۇلكەن ساباق رەتىندە قابىلداڭىز. وتكەن ءومىرىڭىز بۇگىنگى كۇنىڭىزگە كولەڭكە بولماسىن.
تاربيە: ەگەر بالا كەزىڭىزدەن اينالاڭىزداعى جانداردىڭ ءسىزدىڭ ءىس- ارەكەتىڭىزگە كوڭىل تولمايتىنىن ءجيى ەستىپ وسسەڭىز، بۇل قازىر باتىل شەشىم قابىلداۋىڭىزعا كەدەرگى بولاتىنى انىق. ءبىراق، ءسىز ەسەيدىڭىز ءارى بۇل - ءسىزدىڭ ءومىرىڭىز، تاڭداۋىڭىز. وعان وزگەلەردىڭ ارالاسۋىنا جول بەرمەڭىز.
ءوزىڭىزدى وزگەمەن سالىستىرۋ: ءسىز - جەكە تۇلعاسىز. ءسىزدىڭ جەكە پىكىرىڭىز بار. ءوزىڭىزدى وزگەلەرمەن سالىستىرۋدان گورى، باعاڭىزدى ءبىلۋ تيىمدىرەك. ءار ادام - ءارتۇرلى. سەنىڭىز، ءسىزدىڭ قولىڭىزدان كەلەتىن كەي زات ءسىز قىزىعاتىن ادام ءۇشىن تاڭسىق بولۋى مۇمكىن. دەگەنمەن، كەيدە دامۋ ءۇشىن ءوزىڭىزدى وزگەلەرمەن سالىستىرىپ وتىرۋ ارتىق ەتپەيدى. تەك شەكارادان اسپاساڭىز بولدى.
بەيتانىس جاعداي: كەنەتتەن ورىن العان وقيعا كەزىندە وزىڭىزگە دەگەن سەنىمدىلىگىڭىز جوعالىپ كەتە مە؟ ۋايىمداماي، بۇل جاعدايدى سىزگە بەرىلگەن مۇمكىندىك رەتىندە قابىلداڭىز. دۇرىس شەشىم قابىلداپ، ناقتى ارەكەتكە كوشىڭىز. قورقىنىشىڭىزدى جاسىرۋدى ۇمىتپاڭىز.
ءۇش اپتادا وزىڭىزگە دەگەن سەنىمدىلىكتى وياتۋ ءۇشىن:
• 1-اپتا: كۇن سايىن ءسىزدى باقىتقا بولەگەن 3 نارسەنى جازىپ ءجۇرىڭىز. ۋاقىت وتە ومىرىڭىزە قۋانۋعا تۇرارلىق نارسەنىڭ كوپ ەكەنىن اڭعارا باستايسىز.
• 2-اپتا: ءوزىڭىزدىڭ قابىلەتىڭىزگە كۇمان كەلتىرگەن جاعدايلاردى، ونىڭ تۋۋىنا اكەلگەن سەبەپتى جازىڭىز. اپتا اياعىندا ءوزىڭىزدىڭ باستى قورقىنىشىڭىزدى انىقتايسىز. كەيىن ونىمەن كۇرەسۋدىڭ جولىن قاراستىرىڭىز.
• 3-اپتا: وزىڭىزگە دەگەن سەنىمسىزدىكپەن كۇرەسۋ ءۇشىن قانداي ارەكەتكە بارعانىڭىزدى جازىڭىز. قادامىڭىز كىشكەنتاي بولسا دا، مۇنىڭ ءوزى - ىلگەرى جىلجۋ. دەمەك، ءسىز ماقساتىڭىزعا جاقىنداپ قالدىڭىز. وزىڭىزگە دەگەن سەنىمسىزدىكتەن ارىلساڭىز، كەي ارماندارىڭىزدىڭ قاقپاسى جاقىن ەكەنىن اڭعاراسىز. ساتتىلىك تىلەيمىز!
Massaget.kz
