تۇركى مەملەكەتتەرى ءۇشىن وداق قۇرۋدىڭ قاجەتى جوق - پروفەسسور ورتايلى

استانا. قازاقپارات - تانىمال تۇرىك تاريحشىسى، پروفەسسور يلبەر ورتايلى تۇركى مەملەكەتتەرىنىڭ وداعىن قۇرۋعا قاتىستى پىكىر ءبىلدىردى. عالىم نازاربايەۆ ۋنيۆەرسيتەتىندە تۇركى الەمى جانە تۇركولوگيا ماسەلەلەرى بويىنشا ءدارىس وقىدى،

 دەپ حابارلايدى قازاقپارات ءتىلشىسى.

«نەگىزى، تۇركى مەملەكەتتەرى كوپ. ولار سول كوپتىگىمەن مىقتى. ءبىراق مىندەتتى تۇردە ەۋروپا وداعى سياقتى بىرىگۋدىڭ قاجەتى جوق دەپ ويلايمىن. ارابتار دا ءوزارا بىرىگىپ، وداق قۇرىپ جاتىر. مەنىڭشە، بۇنداي وداقتاردىڭ قاجەتى جوق. ونىڭ ءبارى - قۇر اۋرەشىلىك. ەۋروپا وداعى دا السىرەي باستادى. ۇلى بريتانيا ودان شىعىپ جاتىر. ويتكەنى بريۋسسەلدە بيۋروكراتيا كوپ. ونداي ورتالىققا ەشكىم جۇمىس ىستەگىسى كەلمەيدى. سوندىقتان ورتالىق ءبىر اكىمشىلىكتى قۇرۋدىڭ قاجەتى شامالى. بىزدە ەكونوميكالىق ىنتىماقتاستىق بار، ءبىلىم- عىلىم سالاسىندا دا ءوزارا الىس- بەرىستەر كوپ. اركىم وزىنە قاراي جۇمىس ىستەۋى كەرەك. ءبىراق مادەني بايلانىستاردى ۇزبەۋ قاجەت»، - دەدى ي. ورتايلى سۇراق- جاۋاپ سەسسياسى كەزىندە.

عالىمنىڭ ويىنشا، تۇركى مەملەكەتتەرىنىڭ ەكونوميكالىق وداعىن قۇرۋعا بولادى. ءبىراق ساياسي ۇيىمنىڭ قاجەتى شامالى.

«بىزدە «ءتىل» دەگەن بىرىكتىرۋشى فاكتور بار. سوسىن ءبىلىم مەن عىلىمدى دامىتۋىمىز قاجەت. تەاتر مەن كينو جاعى دا وتە ماڭىزدى. اقپاراتتىق تەحنولوگيالار بار. قازىرگى زامان ونەرىن دە بىرلەسىپ دامىتۋمىز قاجەت. سونىڭ ءبارىن بىرگە ىستەسەك، ءبىراز جەتىستىككە جەتە الامىز»، - دەپ اتاپ كورسەتتى ي. ورتايلى.

اۆتور: ارمان اسقاروۆ