فرانسۋز بيزنەسى قازاقستاندا ءوزىن جاقسى سەزىنگەنىن قالايمىز - ساعىنتايەۆ

استانا. قازاقپارات - فرانسۋز بيزنەسى قازاقستاندا ءوزىن بارىنشا جاقسى سەزىنگەنىن قالايمىز. بۇل تۋرالى بۇگىن فرانسيا- قازاقستان ساۋدا- ونەركاسىپ پالاتاسى ۇيىمداستىرعان دوڭگەلەك ۇستەل بارىسىند ق ر پرەمەر- ءمينيسترى باقىتجان ساعىنتايەۆ ايتتى، دەپ حابارلايدى قازاقپارات.

«وتكەن جىلى قازاقستان مەن فرانسيا اراسىنداعى ديپلوماتيالىق قارىم- قاتىناستىڭ 25 جىلدىعىن اتاپ وتسەك، بيىل ەلدەرىمىز اراسىنداعى ستراتەگيالىق سەرىكتەستىكتىڭ 10 جىلدىعىن اتاپ وتپەكپىز. وسى جىلدار بويى فرانسيا ءبىزدىڭ دوسىمىز ءارى سەنىمدى سەرىكتەستىگىمىز بولعانى بارىنشا ماڭىزدى. ءبىز ەكونوميكا، ءبىلىم، عىلىم، بيزنەس، تۋريزم سىندى ءبىرقاتار باعىتتا ىنتىماقتاستىقتامىز. بۇگىن وسى زالدا قازاقستاندا جۇمىس ىستەيتىن فرانسۋز بيزنەسىنىڭ وكىلدەرى وتىر. وسى مۇمكىندىكتى پايدالانا وتىرىپ، قازاقستان ۇكىمەتى سىزدەردى باعالايتىندىعىن ءارى بارلىق دەڭگەيدە قولداۋ كورسەتەتىندىگىن اتاپ وتكىم كەلەدى»، - دەدى ق ر پرەمەر- ءمينيسترى.

سونىمەن قاتار، ول فرانسيا قازاقستاننىڭ ەۋروپاداعى نەگىزگى ساۋدا سەرىكتەستەرىنىڭ ءبىرى ەكەندىگىن باسا ايتتى.

 «بۇگىندە قازاقستاندا فرانسۋز كاپيتالىنىڭ قاتىسۋىمەن 140-قا جۋىق بىرلەسكەن كومپانيا جۇمىس ىستەيدى. ولاردىڭ قاتارىندا Alstom, Airbus سىندى ءىرى كومپانيالاردىڭ وكىلدەرى بار. ءبىز فرانسۋز بيزنەسى قازاقستاندا ءوزىن بارىنشا جاقسى سەزىنگەنىن قالايمىز جانە بۇل باعىتتان بەلسەندى جۇمىس جۇرگىزىپ جاتىرمىز»، - دەدى باقىتجان ساعىنتايەۆ.

ۇكىمەت باسشىسى قازىرگى ۋاقىتتا فرانسيا ازاماتتارى قازاقستانعا ۆيزاسىز كەلە الاتىندىعىن ەكى ەلدىڭ اراسىندا تىكەلەي اۋە رەيسى اشىلعاندىعىن اتاپ ءوتتى.

«قازىرگى ۋاقىتتا قازاقستان ءوز دامۋىنىڭ وتە قىزىقتى ءارى قارقىندى كەزەڭىندە تۇر. وتكەن جىلى ەكونوميكا ءوسىمى 4 پايىزدى قۇراپ، ونەركاسىپتىڭ تۇراقتى ءوسىمى تىركەلدى. ءبىز وسى وڭ ديناميكانى ساقتاپ، ارتتىرۋعا نيەتتىمىز»، - دەدى ول.