مينيستر ءابىلقاسىموۆا انا مەن بالاعا بولىنەتىن قارجىنىڭ قىسقارۋىن ءتۇسىندىردى
پارلامەنت سەناتىنىڭ بۇگىنگى وتىرىسىندا «2018-2020-جىلدارعا ارنالعان رەسپۋبليكالىق بيۋجەت تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن. تالقىلاۋ بارىسىندا سەناتور دينار نوكەتايەۆا الەۋمەتتىك سالاعا بولىنەتىن شىعىستار مازالاپ وتىرعانىن جەتكىزدى.
«10 ميلليارد 722 ميلليون تەڭگە - ونىڭ ىشىندە 5 ميلليارد 720 ميلليو تەڭگە قىسقارتىلعان (...). ناقتىراق ايتقاندا، ورتاشا تولەمدەرگە بايلانىستى ءبىر رەتتىك تولەماقى - ول مىنا ءبىر جاسقا كەلگەنگە دەيىنگى بالالارعا تولەنەتىن جانە بالا كۇتىمىنە اي سايىن تولەنەتىن قاراجات. سول قىسقارتىلىپ وتىر. بۇنى قالاي تۇسىنۋگە بولادى؟ مىسالى، كورشىلەس ەلدەردى الاتىن بولساق، بالانىڭ تۋۋىنا جىلدان جىلعا قولداۋ كورسەتىلىپ كەلەدى. بالانىڭ تۋۋىنا، كۇتىمىنە بولىنەتىن قاراجاتتى جىلدان جىلعا كوبەيتۋ ارقىلى بالالى بولۋدى ۇلكەن مارتەبەگە اينالدىرۋدا. ونىڭ قارجىسىن ۇلعايتۋدا. ءبىز نەگە ونى قىسقارتىپ جاتىرمىز؟ مىسالى، رەسەي فەدەراتسياسىندا «انا كاپيتالى» دەگەن بار. بالا مەن اناعا بەرىلەتىن قاراجاتتى قىسقارتۋ ارقىلى بالا سانىن قالاي كوبەيتەمىز؟ دەموگرافيانى قالاي كوتەرەمىز؟ »، - دەدى سەناتور.
اتالعان سۇراققا ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا جاۋاپ بەردى.
«وسى بيۋجەتتىڭ شىعىستارى 5 ميلليارد 700 ميلليو تەڭگەگە ازايۋىنىڭ بىرنەشە سەبەبى بار. بىرىنشىدەن، 2,7 ميلليارد تەڭگە - بۇل بالا تۋۋىنا ارنالعان ءبىرجىلدىق جاردەماقى جانە بالا ءبىر جاسقا تولعانعا دەيىن كۇتىمىنە اي سايىنعى جاردەماقى الۋشىلاردىڭ بولجامدى سانىنىڭ ازايۋىنا بايلانىستى (...) بۇل ەڭ ءبىرىنشى سەبەپ. ءبىز جوسپارلاعاندا - 5 جىل بويى بالا تۋۋ ديناميكاسى ءوسىپ جاتقان. ءبىراق 2017-جىلعا قاراساق، تۋۋ 19 مىڭ بالاعا ازايدى. وسى جىلى جاردەماقى الاتىن ادامداردىڭ سانى قايتادان ازاياتىنىن كۇتىپ وتىرمىز. وسى جىلدىڭ شىعىستارىن قاراستىرعاندا، ءبىز سول بەس جىلدىڭ ديناميكاسىن العان ەدىك. ءبىراق، 2017-جىلدىڭ قورىتىندىسى بويىنشا ءبىزدىڭ بولجامىمىز وزگەردى. بۇل نەگىزگى سەبەپ. ءبىراق، ايتا كەتەيىن، وسى جاردەماقىنىڭ سانى دا مولشەرى ءبىرقالىپتا قالدى. ءتىپتى ءوسىپ كەلەدى»، - دەدى مينيستر.
ونىڭ ايتۋىنشا، بالا كۇتىمىنە بايلانىستى تولەمدەردى ءقازىر كوپ ايەلدەر جۇمىسقا ورنالاسىپ، ونى الەۋمەتتىك ساقتاندىرۋ قورىنان الىپ جاتىر.
«تاعى ءبىر سەبەپ - وزدەرىڭىز بىلەتىندەي، ءبىرىنشى جانە ەكىنشى بالاعا ارنالعان تولەمدەردىڭ مولشەرى ازداۋ بولادى دا، ءۇشىنشى جانە ءتورتىنشى بالاعا كوبىرەك تولەنەدى. قازىرگى ءبىزدىڭ بولجام بويىنشا ءۇشىنشى جانە ءتورتىنشى بالا تۋۋعا بايلانىستى تولەمدەردىڭ سانى ازايدى. ءبىر جانە ەكى بالالى جانۇيالاردىڭ سانى كوبەيدى. سول سەبەپتەن ءبىز شىعىستاردى قايتا قىسقارتتىق. ءبىراق، بارلىق تولەمدەردىڭ مولشەرى ايتقانىمداي ءبىر قالىپتا قالىپ جاتىر. ءتىپتى مولشەرى ءوسىپ كەلەدى»، - دەپ ءتۇيدى ءمادينا ءابىلقاسىموۆا.
