ەلوردادا ۇزدىك ارحيۆشى بەلگىلى بولدى

استانا. قازاقپارات - استاناداعى مەملەكەتتىك ارحيۆتە «ەڭ ۇزدىك ارحيۆيست» بايقاۋى ءوتتى، دەپ حابارلايدى قازاقپارات قالا اكىمدىگىنىڭ سايتىنا سىلتەمە جاساپ.

سايىس 23 -ءساۋىر مەن 25 -ءساۋىر ارالىعىندا جاريالانعان بولاتىن. كونكۋرسقا مەملەكەتتىك ارحيۆتىڭ 16 مەكەمەسى قاتىستى.

بايقاۋدىڭ قورىتىندىسى جاريالانىپ، جەڭىمپازدار انىقتالدى. استانا قالاسى ج ق ت ب- نىڭ الدىن الۋ جانە باقىلاۋ ورتالىعىنىڭ ارحيۆيسى شاريپا تولەبايەۆا باس جۇلدە، قيىن جاعدايداعى ادامدار ءۇشىن وڭالتۋ ورتالىعىنىڭ ارحيۆيسى ءادىلحان بەكسۇلتانوۆ 1-ورىن، «استانا باس جوسپار عىلىمي زەرتتەۋ جوباسى ينستيتۋتى» ج ش س ارحيۆيسى سۆەتلانا رەپينا 2-ورىن، استانا قالاسى دەرماتولوگيا جانە جىنىس قاتىناسى اۋرۋلارىن الدىن الا ەمدەۋ ورتالىعى ارحيۆيسى بانۋ احمەتوۆا 3-ورىندى جەڭىپ الدى. ال قالعان 12 مۇراعات قىزمەتكەرىنە العىس حاتتار تابىس ەتىلدى.

«قوعام دامۋىنىڭ ءتۇرلى ساتىلارىندا بيلىك ورگاندارىنىڭ مەملەكەتتىك ساياساتى مەن ستراتەگيالىق ماقسات مۇددەلەرىنە تيىسىنشە باسىمدىق بەرىلەدى. مىنە، سوندىقتان دا بولار، ارحيۆيستەرگە وتكەن ۇرپاق قالدىرعان بايلىقتاردى كوزدىڭ قاراشىعىنداي ساقتاۋ، مەملەكەتىمىزدىڭ ءوسۋ جولىنداعى كەمەل ىستەردى بار بولمىسىمەن كورسەتۋ، ونىڭ وركەنيەتتى دۇنيەجۇزىلىك قاۋىمداستىق تالاپتارىنا ساي بولۋىن ەسكەرۋ مىندەتتەرى جۇكتەلگەن»، - دەدى قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى قايرات قامباروۆ.

بايقاۋ قالالىق تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن استانا قالاسىنىڭ مەملەكەتتىك ارحيۆىندە ەلوردانىڭ 20 جىلدىعىنا ارنالدى.