بيىل ۇلتتىق ءبىرىڭعاي تەستتە قانداي وزگەرىس بولادى؟
بۇل تۋرالى استانادا حالىقپەن ەسەپتىك كەزدەسۋ وتكىزگەن ق ر ءبىلىم جانە عىلىم ءمينيسترى ەرلان ساعاديەۆ ايتتى، دەپ حابارلايدى قازاقپارات ءتىلشىسى.
«اعىمداعى جىلى ۇلتتىق ءبىرىڭعاي تەست تاپسىرۋ ەرەجەسى وزگەرگەن جوق. دەگەنمەن، تەست تاپسىرۋشىلارعا ىڭعايلى بولۋى ءۇشىن ازداعان تۇزەتۋلەر ەنگىزىلدى. ۇ ب ت بەس پاننەن تۇرادى: ۇشەۋى مىندەتتى جانە ەكەۋى تاڭداۋى بويىنشا. بۇگىنگى كۇنى تەست تاپسىرمالارى بازاسىنىڭ 50 پايىزى جاڭارتىلدى. سونىمەن قاتار ۇ ب ت- نى اعىلشىن تىلىندە دە تاپسىرۋعا مۇمكىندىك بەرىلەدى. قازىردىڭ وزىندە شامامەن 200 ادام جازىلدى»، - دەدى مينيستر.
بۇعان دەيىن حابارلاعانىمىزداي، ۇلتتىق ءبىرىڭعاي تەستىلەۋدى اعىلشىن تىلىندە تاپسىرعىسى كەلەتىن تۇلەكتەردەن وتىنىمدەردى قابىلداۋ 10- ناۋرىز كۇنى باستالدى. بۇل جۇمىس مامىردىڭ ورتاسىنا دەيىن جالعاسادى. تەستتى اعىلشىن تىلىندە تاپسىرعىسى كەلەتىندەردىڭ ناقتى سانى سول كەزدە بەلگىلى بولادى.
ق ر ءبىلىم جانە عىلىم ۆيتسە-ءمينيسترى اسحات ايماعامبەتوۆتىڭ ايتۋىنشا، اعىلشىن تىلىندەگى سۇراقتاردىڭ قازاقشا جانە ورىسشا نۇسقادان ايىرماشىلىعى جوق.
«اعىلشىن تىلىندەگى سۇراقتار دايىن جانە تەست كىتاپشالارىنا ەنگىزىلدى. بارلىق سۇراقتار وقۋ باعدارلاماسىن قامتيدى جانە ءبىلىم بەرۋ تالاپتارىنا ساي كەلەدى. قازاقشا بولسىن، ورىسشا بولسىن، مازمۇنى جاعىنان كوپ ايىرماشىلىق جوق»، - دەپ اتاپ كورسەتكەن ەدى ا. ايماعامبەتوۆ.
