الماتى وبلىسىنداعى تاۋ جىنىستارىنىڭ كوشكىنى زەرتتەلىپ جاتىر

استانا. قازاقپارات - الماتى وبلىسىندا كوشكىن ورنىندا گەوگرافيا ينستيتۋتى عىلىمي قىزمەتكەرلەرى زەرتتەۋ جۇمىستارىن جۇرگىزدى.

 بۇل تۋرالى ق ر ءى ءى م توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆ ءمالىم ەتتى، دەپ حابارلايدى قازاقپارات.

 «2018 -جىلعى 19 - ساۋىردە كەگەن اۋدانى اۋماعىندا تاۋ جىنىستارىنىڭ كوشكىنى انىقتالدى. 23 - ساۋىردەگى جاعداي بويىنشا كوشكىن كولساي وزەنىنە قاراي جىلجىپ كەلەدى. ونىڭ قوزعالىسى ساعاتىنا 0,4 مەترگە دەيىن تومەندەدى»، - دەلىنگەن كوميتەت مالىمەتىندە.

ايتا كەتەيىك، 21 - ساۋىردە كوشكىن ماسساسى ەكى ۋچاسكەگە ءبولىنىپ، وڭتۇستىك ۋچاسكە كولساي وزەنىنىڭ ارناسىنا جەتتى. ال سولتۇستىك بولىگى دە وزەنگە قاراي جىلجىپ كەلەدى جانە وزەنگە دەيىنگى اراقاشىقتىق 67 مەتردى قۇرادى.

«اتالعان جەردە الماتى وبلىسى ت ج د- نىڭ جەدەل شتابى جۇمىس ىستەۋدە. گەوگرافيا ينستيتۋتىنىڭ عىلىمي قىزمەتكەرلەرى كوشكىن ورنىندا زەرتتەۋ جۇمىستارىن جۇرگىزدى. ونىڭ ناتيجەلەرى الداعى ۋاقىتتا جاريا ەتىلەدى. جەرگىلىكتى اتقارۋشى ورگاندار كولساي كولىندەگى دەمالىس اۋماعىنا باراتىن جول مەن ەلەكتر جەلىسىن قالپىنا كەلتىرۋ ماسەلەسىن شەشىپ جاتىر»، - دەدى ۆەدومستۆودان.

قازىرگى كەزدە تاۋ جىنىستارىنىڭ كوشكىنى ەلدى مەكەندەرگە قاۋىپ ءتوندىرىپ تۇرعان جوق.

اۆتور: رۋسلان عابباسوۆ