قايرات ءابدىراحمانوۆ بەيجىڭدەگى اباي ەسكەرتكىشىنە گۇل شوقتارىن قويدى

استانا. قازاقپارات - بۇگىن ق ر سىرتقى ىستەر ءمينيسترى قايرات ءابدىراحمانوۆ، قازاقستاننىڭ قىتايداعى توتەنشە جانە وكىلەتتى ەلشىسى شاحرات نۇرىشيەۆ جانە قازاقستاندىق ديپلوماتتار مەن «جيڭتاي» مۋزەيىنىڭ قىزمەتكەرلەرى بەيجىڭنىڭ «چاۋيان» ورتالىق ساياباعىندا ورنالاسقان اباي ەسكەرتكىشىنە گۇل شوقتارىن قويدى، دەپ حابارلايدى قازاقپارات اگەنتتىگىنىڭ قىتايداعى مەنشىكتى ءتىلشىسى.

تاعزىم ەتۋ راسىمىنەن سوڭ بەيجىڭدەگى اباي قۇنانباي ۇلى ءبيۋستىنىڭ اۆتورى، بەلگىلى قىتايلىق ءمۇسىنشى يۋان سيكۋن قازاقستاننان كەلگەن قوناقتار ءۇشىن «جيڭتاي» مۋزەيىندە ارنايى ەكسۋرسيا جۇرگىزدى.

«ق ر سىرتقى ىستەر ءمينيسترى قايرات ءابدىراحمانوۆتى ءوز مۋزەيىمىزدە كورگەنىمىزگە قۋانىشتىمىز. ءبىز قازاقستان ەلشىلىگىمەن تىكەلەي بايلانىستامىز جانە وتە جاقسى قارىم-قاتىناستامىز. ەلشىلىكپەن بىرلەسىپ، ءتۇرلى مادەني شارالاردى، كورمەلەردى، «اباي وقۋلارىن»، ابايدىڭ تۋعان كۇنىن وتكىزەمىز. مۇنداي شارالار الەمدىك مادەنيەت قازىناسى بولىپ سانالاتىن اباي فيلوسوفياسىن ناسيحاتتاۋعا سەپتىگىن تيگىزەدى»، - دەدى «جيڭتاي» مۋزەيىنىڭ ديرەكتورى جو حۋا قازاقپارات تىلشىسىنە بەرگەن سۇحباتىندا.

ەسكە سالا كەتسەك، بەيجىڭ قالاسىنداعى اباي ءمۇسىنى 2014-جىلدىڭ 19- ناۋرىزىندا قىتايداعى ق ر ەلشىلىگىنىڭ باستاماسىمەن ورناتىلعان بولاتىن.

ق ر سىرتقى ىستەر ءمينيسترى قايرات ءابدىراحمانوۆ بەيجىڭگە ش ى ۇ- عا مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ كەزەكتى وتىرىسىنا قاتىسۋ ءۇشىن رەسمي ساپارمەن كەلدى.