شەتەلگە ساپارلايتىن قازاقستاندىقتار ەڭ الدىمەن نەنى ەسكەرۋى كەرەك؟
بارعان ەلدىڭ اۋەجايىنا جەتكەن كەزدە-اق سول مەملەكەتكە كىرگىزىلمەيتىنىن بىلگەن جاعدايدا ازاماتتار قايدا جۇگىنۋى ءتيىس؟ قازاقپارات ءتىلشىسىنىڭ وسى قاتارلى رەسمي ساۋالدارىنا ق ر س ءى م جاۋاپ بەردى.
ەسكە سالا كەتسەك، بۇعان دەيىن قازاقستان ازاماتتارىنىڭ كەيبىر ەلدەرگە كىرگىزىلمەۋىنە نە سەبەپ بولىپ وتىرعانىن جازعان ەدىك. ماسەلەن، وسى جىلدىڭ اقپان ايىنىڭ 20 ى كەزىندە كورەيا رەسپۋبليكاسىنا بارعان 20 قازاقستاندىق ازاماتتى جەرگىلىكتى بيلىك سەبەبىن ەش تۇسىندىرمەستەن اۋەجايدا قالۋعا ءماجبۇر ەتكەن بولاتىن. جالعىز كورەيا ەمەس، تاعى ءبىرقاتار مەملەكەتتە قازاقستاندىقتاردىڭ وسىنداي جاعدايعا تاپ بولعانى ايتىلعان.
قازاقپاراتتىڭ رەسمي ساۋالىنا جاۋاپ بەرگەن ق ر سىرتقى ىستەر مينيسترلىگى قازاقستاندىقتاردىڭ كەيبىر ەلدەرگە كىرگىزىلمەۋىنىڭ سەبەپتەرىن تارقاتقان ەدى. اتاپ ايتقاندا، مۇنداي جاعدايعا تاپ بولماس ءۇشىن شەتەلگە شىعاتىن ازاماتتاردىڭ ۆيزانى رەسىمدەپ، جەتكەن ەلدىڭ اۋەجايىندا سۇراۋعا ناقتى ماقساتتا جاۋاپ بەرۋى كەرەكتىگى ايتىلعان بولاتىن.
ال ءدال وسىنداي جاعدايعا تاپ بولعان قازاقستاندىقتار نە ىستەۋى كەرەك؟ مۇنداي جاعدايدا قازاقستاندىقتار كىمنەن قانداي كومەك سۇراي الادى؟ قازاقپاراتتىڭ بۇل سۇراعىنا ق ر س ءى م حالىقارالىق اقپارات كوميتەتى ءتوراعاسىنىڭ مىندەتىن اتقارۋشى ساتىبالدى بۇرشاقوۆ جاۋاپ بەردى.
«مۇنداي جاعدايلارعا تاپ بولماس ءۇشىن ءاربىر ق ر ازاماتى شەت ەلگە شىعار الدىندا ول ەلدىڭ جەرگىلىكتى زاڭى مەن شەتەلدىكتەردىڭ بولۋ تارتىپتەرىنەن حاباردار بولعانى ءجون. سونداي-اق، شەت ەلگە تۋريستىك ۆيزامەن بارعان ازاماتتار جۇمىسقا الىنبايتىنىن قاتاڭ ەسكەرتەمىز. ءبىرقاتار شەت ەلدەردەن (شەنگەن ەلدەرى، تۇركيا، ا ق ش جانە ت. ب.) شىعارىلىپ جىبەرىلگەن ق ر ازاماتىنا اعىلشىن تىلىندە رەسىمدەلگەن شىعارىپ جىبەرىلۋى تۋرالى قۇجات بەرىلەدى. بۇل قۇجاتتا شىعارىپ جىبەرۋدىڭ سەبەبى كورسەتىلەدى. بۇل شەشىمگە شاعىم جاساۋ ءۇشىن ق ر- داعى شەتەل ەلشىلىگىنە جۇگىنۋ قاجەت»، - دەپ جاۋاپ بەردى ساتىبالدى بۇرشاقوۆ.
ونىڭ ايتۋىنشا، قازاقستاندىق ازاماتتار جوعارىدا كورسەتىلگەن كەلەڭسىز جاعدايلارعا تاپ بولسا، دەرەۋ سول ەلدەردەگى ق ر كونسۋلدارىنا حابارلاسۋى كەرەك. سوندىقتان، ق ر سىرتقى ىستەر مينيسترلىگى ازىرلەگەن «SmartTravel» موبيلدىك قوسىمشانى جۇكتەپ العان ءجون.
«حالىقارالىق ءتارتىپ بويىنشا شەت ەلگە شىققان ازاماتتىڭ قولىندا مەديتسينالىق ساقتاندىرۋ قۇجاتى بولۋى ءتيىس. ساقتاندىرۋ قۇجاتتارىندا قانداي وقيعالارعا، توسىن جاعدايلارعا دۋشار بولعاندا ساقتاندىرىلاتىنى اتاپ كورسەتىلەدى. ەگەر كەنەتتەن بولعان وقيعالارعا (اۋىرىپ قالۋ، اۆتوكولىك اپاتىنا ۇشىراۋ ت. ب.) دۋشار بولعان ادامنىڭ ساقتاندىرۋ قۇجاتىندا كورسەتىلمەگەن بولسا، ساقتاندىرۋ كومپانيالارى شىعىندى تولەۋدەن باس تارتادى. سوندىقتان، شەت ەلگە شىققان ءاربىر ق ر ازاماتى ساقتاندىرۋ قۇجاتتارىن ناقتىلاپ العاندارى ءجون نەمەسە قالتالارىندا (شوتتارىندا) جەتكىلىكتى كولەمدە قاراجاتتارىنىڭ بولعانى دۇرىس»، - دەيدى بۇرشاقوۆ.
2017-جىلدىڭ ستاتيستيكالىق مالىمەتتەرىن كەلتىرگەن ق ر س ءى م كورەيادان زاڭسىز جۇرگەن 1512 ق ر ازاماتى ءوز ەركىمەن قازاقستانعا ورالىپ، 617 ازاماتتى جەرگىلىكتى پوليتسيا دەپورتاتسيالاعانىن حابارلايدى. تۇركيا رەسپۋبليكاسىنان دا وتكەن جىلى سىرتقى ىستەر مينيسترلىگىنەن شىعارىپ جىبەرىلگەن 10 ق ر ازاماتتارى تۋرالى اقپارات كەلىپ تۇسكەن. سونداي-اق، ەلگە كىرۋگە ءتيىستى ۆيزالارى بولماعاندىقتان جانە كەلۋ ماقساتىن دالەلدەي الماعاندىقتان ليتۆاعا باراتىن 6 ق ر ازاماتقا، مەكسيكاعا 1، پاناماعا 3 جانە ماينداعى فرانكفۋرتقا باراتىن 9 ق ر ازاماتقا سول ەلدەرگە كىرۋگە رۇقسات بەرىلمەگەن.
