ەرلان كۇمىسقاليەۆ: ەرەكشە بالالاردى ەندى ات سپورتىنا دايىندايمىن
ەندى ول بالالاردى ات سپورتى ويىندارىنان وتكىزىلىپ جۇرگەن حالىقارالىق پاراليمپيادالارعا دايىنداۋدى قولعا الماقشى، دەپ حابارلايدى قازاقپارات ءتىلشىسى.
«اتىراۋ. مالەنكايا سترانا» قوعامدىق ۇيىمىنىڭ جەتەكشىسى ەرلان كۇمىسقاليەۆ قۇرمانعازى اۋداندىق ورتالىقتاندىرىلعان كىتاپحانا ۇيىمداستىرعان شارا بارىسىندا وسىلاي ءمالىم ەتتى.
قازىر ءتۇرلى دياگنوز قويىلعان بۇل سابيلەردىڭ ءومىرى قىل ۇستىندە تۇر. «كانيستەراپيا» دەپ اتالاتىن ءادىستى قولدانعان دارىگەر ەمنىڭ قىر-سىرىمەن ءبولىستى.
دۇنيەگە كەمتار بولىپ كەلگەن بالانىڭ جۇزىنەن كۇلكىمەن قۋانىشتى كورۋ ءۇشىن بارىنە دايار بولعان جان ولاردى ماسكەۋدىڭ «سولنەچنىي پەس» ورتالىعىنان ۇيرەنگەن ءادىس-تاسىلدەرى بويىنشا كانيستەراپيا، ياعني يتپەن ەمدەۋدى قولعا الادى. ونىمەن اينالىسپاس بۇرىن ەرلان كاسىپكەر بولعان ەكەن. قىمبات كولىك ءمىنۋ، ادەمى كيىنۋ، كەرەمەت قالالاردى ارالاۋ ونىڭ ارمانى ەمەس. ەڭ باستىسى، بالالاردىڭ ساۋىعىپ، ەل قاتارلى ءومىر ءسۇرۋى وعان قۋانىش سىيلايدى. باقىتتىڭ نە ەكەنىن ەرلان وسىلاي تۇسىنەدى. «ەمدەۋ ءادىسىن العاشىندا تۋىستارىمنىڭ مۇمكىندىگى شەكتەۋلى بالالارىنا قولدانىپ كوردىم»، - دەيدى ەرلان كۇمىسقاليەۆ.
ول تۇرعىندارمەن كەزدەسۋ بارىسىندا، ءيتتىڭ قاسىندا بالا ءوزىن اناعۇرلىم جايلى سەزىنەدى. جەتى قازىنانىڭ ءبىرى سانالاتىن ءۇي جانۋارى بالانىڭ پسيحيكالىق دامۋ پروبلەماسىنان قۇتىلۋىنا كومەكتەسەدى ەكەن. قوعامدىق بىرلەستىكتىڭ جۇمىسى وسىدان 5 جىل بۇرىن اشىلعان. وسى ۋاقىت ارالىعىندا كانيستەراپيا ءادىسى ارقىلى ءار ءتۇرلى سىرقاتقا شالدىققان جۇزدەگەن بالا ەم-دومنان وتكەن.
«التىن جۇرەكتى ادام» رەتىندە تانىلعان ەرلان كۇمىسقاليەۆ «ەندى ەرەكشە بالالاردى ات سپورتى ويىندارىنان وتكىزىلىپ جۇرگەن حالىقارالىق پاراليمپيادالارعا دايىنداۋدى قولعا الماقشىمىن»، - دەيدى ول.
ايتا كەتەلىك، «رۋحاني جاڭعىرۋ» باعدارلاماسى اياسىندا «100 جاڭا ەسىم» جوباسىنا اتى ەنگىزىلگەن ەرلان كۇمىسقاليەۆ بىرنەشە جىلدان بەرى جۇيكە جۇيەسى زاقىمدانعان بالالاردى تەگىن ەمدەپ كەلەدى.
