شىعىس قازاقستان تاسجولىندا ايۋ ءجۇر دەگەن اقپارات تارادى
وسى اقپاراتتىڭ قانشالىقتى شىندىققا جاناساتىنىن قازاقپارات ءتىلشىسى وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنان سۇراپ ءبىلدى.
ۆيدەودا قوڭىر ايۋدىڭ كولىكتەردىڭ الدىنا ءتۇسىپ الىپ، اسىقپاي اياڭداپ بارا جاتقانى انىق كورىنەدى. جەلى قولدانۋشىلارى كەسكىن الىنعان جەردىڭ بەدەرى وسكەمەن- سامار تاسجولىنىڭ تابيعاتىنان اۋمايتىندىعىن ايتۋدا. ونىڭ ۇستىنە 19 -ءساۋىردىڭ تاڭىندا اتالمىش جولدىڭ تاۋلى بولىكتەرىندە ۆيدەوداعىداي قار جاۋعان بولاتىن. بەينەنىڭ ساپاسى تۇنىق بولماعاندىقتان، كولىكتەردىڭ مەملەكەتتىك ءنومىرىن انىقتاۋ مۇمكىن ەمەس.
تابيعي رەسۋرستار جانە تابيعات پايدالانۋدى رەتتەۋ باسقارماسىنا قاراستى جانۋارلار الەمىن قورعاۋ ءبولىمىنىڭ باسشىسى ارمان ەسەنتايەۆ ۆيدەوعا قاتىستى كەسىمدى اقپارات بەرە المايتىنىن ايتتى. ونىڭ سوزىنشە، شىعىس قازاقستاندا ايۋلار ءساۋىردىڭ باسىنان باستاپ اپانىنان شىعادى. ۇيقىدان جاڭا تۇرىپ، قوڭ جيناپ ۇلگەرمەگەن ايۋدىڭ ويلى-قىرلى جولسىزدى ەمەس، جاتىق جولدى تاڭداۋى تاڭداۋ ابدەن مۇمكىن كورىنەدى.
«ءبىز كەشە تاڭەرتەڭ اتالمىش جولدىڭ بويىنا قار تۇسكەنىن انىقتادىق. جەرگىلىكتى ورمانشىلارعا دا حابارلاستىق، ەشقانداي ايۋدىڭ ءىزىن بايقاماعان. ۆيدەونىڭ كۋاگەرلەرىن تابا المادىق. سوندىقتان ناقتى ءبىزدىڭ وبلىستىڭ اۋماعىندا بولعان وقيعا دەپ كەسىپ ايتا المايمىز. دەگەنمەن، سوڭعى ءۇش جىلدا ايۋلار پوپۋلياتسياسىندا وڭ ديناميكا بايقالىپ وتىر. سانى شامامەن 5 پايىزعا ارتقان. ەۋروپا مەن امەريكا ەلدەرىندە، اۆستراليادا جابايى اڭداردىڭ جولدا كەزىگۋى قالىپتى جاعداي. ونداعى جۇرت اڭنىڭ جولدان الاڭسىز ءوتىپ كەتۋىنە جاعداي جاسايدى. وسىنداي ادەت بىزگە دە قاجەت» - دەيدى ارمان ەسەنتايەۆ.
بۇل ۆيدەونىڭ فەيك ەكەنىن اشكەرەلەيتىن اقپاراتتار دا شىعىپ جاتىر. بەينەتۇسىرىلىم قاڭتار ايىندا youtube كانالىندا تاراعان ەكەن. وقيعا الياسكاداعى ۇلتتىق پاركتىڭ اۋماعىندا بولعان كورىنەدى. شىعىس قازاقستاندىقتاردى ۆيدەوداعى جەردىڭ تابيعاتى مەن بەينە تاراعان كۇنگى اۋا رايىنىڭ سايكەستىگى شاتاستىرعان.
دەگەنمەن، ارمان ەسەنتايەۆ وسكەمەن-سامار تاسجولىنىڭ تاۋلى بولىكتەرىنەن ايۋ كەزدەسۋى ابدەن مۇمكىن ەكەنىن ايتادى. تايىنتى تاۋى مەن اقتاۋ بوكتەرى قوڭىر ايۋلاردىڭ تۇراقتى مەكەنى سانالادى.
«ۇيقىدان جاڭا تۇرعان ايۋلار دەپرەسسيۆتى جاعدايدا بولادى. سوندىقتان، كەزدەسىپ جاتسا، ۋ-شۋسىز وتكىزىپ جىبەرۋ قاجەت. قونجىقسىز ايۋ توپتى ادامعا وزدىگىنەن قاۋىپ توندىرە قويمايدى» - دەيدى مامان.
