سۇيەك ساۋلىعىن ساقتاۋعا ارنالعان كەڭەستەر
مىقتى ءارى ساۋ سۇيەكتەردى بالالىق نەمەسە جاس شاعىندا نىعايتقان دۇرىس، ءبىراق ەرەسەك كەزدە دە سۇيەك دەنساۋلىعىن قورعاۋ ءۇشىن قادامدار جاساۋعا بولادى. ديەتا، فيزيكالىق بەلسەندىلىك جانە باسقا دا فاكتورلار سۇيەك سالماعىنا قالاي اسەر ەتەتىندىگىن قاراستىرايىق. سۇيەك ساۋلىعى نەلىكتەن ماڭىزدى؟ ءبىزدىڭ سۇيەكتەر ءاردايىم اۋىسىپ تۇرادى - جاڭا سۇيەك جاسالىپ، ەسكى سۇيەك بۇزىلادى. ءسىز جاس بولعاندا اعزا ەسكىنى بۇزعانعا قاراعاندا جاڭا سۇيەك جاسۋشاسىن جىلدامىراق جاسايدى، سوندىقتان دەنە ماسساسى ۇلكەيەدى. ادامداردىڭ كوپشىلىگى سۇيەك ماسساسىنىڭ شەگىنە شامامەن 30 جاستا جەتەدى. ودان كەيىن سۇيەك جاسۋشاسىنىڭ جاڭارۋ پروتسەسى جالعاسادى، ءبىراق سۇيەك ماسساسى جينالعاننان گورى، كوبىرەك جوعالادى.
وستەوپوروز اۋرۋى (ءالسىز ءارى سىنعىش سۇيەكتەر) پايدا بولۋ مۇمكىندىگى 30 جاسىڭىزدا قانشالىقتى سۇيەك ماسساسىن جيناعانىڭىزعا جانە ودان كەيىن قانشالىقتى جوعالتا باستايتىندىعىڭىزعا بايلانىستى. سۇيەكتەر ساۋلىعىنا نە اسەر ەتەدى؟
- تاماق تانۋ ۇلەسىڭىزدەگى كالتسي مولشەرى. كالتسي مولشەرى تومەن ديەتالار سۇيەك جاسۋشاسىنىڭ تىعىزدىعى تومەندەۋىنە، سۇيەكتىڭ ەرتە ىدىراۋىنا جانە سىنۋ قاۋپىنىڭ جوعارىلاۋىنا اكەلەدى.
- فيزيكالىق بەلسەندىلىك. فيزيكالىق بەلسەندى ەمەس ادامدار بەلسەندىلەرگە قاراعاندا وستەوپوروز قاۋپىنە دۋشار بولعىش كەلەدى.
- تەمەكى تارتۋ مەن ىشىمدىك. زەرتتەۋلەر ناتيجەسى بويىنشا، تەمەكى تارتۋ سۇيەكتەردىڭ السىرەۋىنە اكەلەدى. سول سەكىلدى مولشەردەن تىس ىشىمدىك ءىشۋ وستەوپوروز قاۋپىن جوعارىلاتادى، سەبەبى ول اعزانىڭ كالتسيدى سىڭىرۋىنە كەدەرگى جاسايدى.
- جىنىس. ايەلدەردە وستەوپوروز قاۋپى جوعارى، سەبەبى ايەلدەردە ەركەكتەرگە قاراعاندا سۇيەك جاسۋشاسى از بولىپ كەلەدى.
- دەنە. وتە ارىق ادامدار (دەنە ماسساسىنىڭ يندەكسى 19 جانە ودان تومەن) قاۋىپ- قاتەر توبىنا جاتادى. سەبەبى ولاردىڭ قورىندا جاس ۇلعايا كەلە قولداناتىن سۇيەك ماسساسى از بولىپ كەلەدى.
- جاس شاماسى. جاس ۇلعايا كەلە سۇيەكتەر جىڭىشكە ءارى ءالسىز بولا باستايدى.
- دۇرىس تاماقتانباۋ. تابەتسىزدىگى (انورەكسيا) نەمەسە مەشكەيلىگى (بۋليميا) بار ادامداردا سۇيەكتەردىڭ ىدىراۋ قاۋپى بار. سونىمەن قاتار، اسقازان وتاسى (گاسترەكتوميا) ، سالماق تاستاۋعا ارنالعان وتا، كرون اۋرۋى، كۋشينگ اۋرۋى اعزانىڭ كالتسيدى ءسىڭىرۋ قاسيەتىنە اسەر ەتەدى.
سۇيەكتەر ساۋلىعىن قالاي ساقتايمىز؟
سۇيەكتەر بۇزىلۋىنىڭ الدىن الۋ ءۇشىن بىرنەشە قاراپايىم قادامدار بار:
- تاماق تانۋ تارتىبىڭىزدە جەتكىلىكتى كالتسي بولۋى كەرەك. 19-50 جاس ارالىعىنداعى ەرەسەكتەرگە جانە 51-70 جاس ارالىعىنداعى ەركەكتەرگە كۇنىنە 1000 مگ كالتسي قولدانۋ ۇسىنىلادى. بۇل شاما 50 جاستان اسقان ايەلدەرگە جانە 70 جاستان اسقان ەركەكتەرگە 1200 م گ دەيىن وسەدى. كالتسي ءسۇتتى تاعامداردا، بادام جاڭعاعىندا، بروككوليدە، ورامجاپىراقتا، ساردينادا بولادى. ەگەر كالتسي تاماقپەن بىرگە جەتكىلىكتى مولشەردە كەلمەسە، ونى قوسىمشا ءىشۋ كەرەك بولادى.
- D دارۋمەنىنە ءمان بەرىڭىز. D دارۋمەنى اعزاعا كالتسيدىڭ جاقسى ءسىڭۋى ءۇشىن قاجەت. D دارۋمەنىنىڭ جاقسى كوزىنە تۋنەتس جانە ساردينا سەكىلدى مايلى بالىقتار، جۇمىرتقانىڭ سارىسى، D دارۋمەنى قوسىلعان ءسۇت جاتادى. ەگەر جەتكىلىكتى مولشەردە D دارۋمەنىن قابىلداماعان بولساڭىز، دارىگەرمەن كەڭەسىپ، قوسىمشا ءىشۋدى قولعا الىڭىز.
- ءوزىڭىزدى ۋاقىتىلى فيزيكالىق جۇكتەمەگە ۇيرەتىڭىز. ءجۇرۋ، جۇگىرۋ، تەننيس، ساتىمەن كوتەرىلۋ سەكىلدى جۇكتەمەسى بار جاتتىعۋلار سۇيەكتەردى بەكىتۋگە جانە سۇيەك ىدىراۋ پروتسەسىن باياۋلاتۋعا كومەكتەسەدى.
- زياندى ادەتتەردەن قۇتىلىڭىز. تەمەكى تارتۋدى جانە مولشەردەن تىس ىشىمدىك ءىشۋدى توقتاتىڭىز.
Massaget.kz
