مەملەكەت باسشىسى «سامۇرىق- قازىنا» ۇلتتىق ءال- اۋقات قورىن باسقارۋ جونىندەگى كەڭەستىڭ وتىرىسىن وتكىزدى

استانا. قازاقپارات - مەملەكەت باسشىسى «سامۇرىق- قازىنا» ۇلتتىق ءال- اۋقات قورىن باسقارۋ جونىندەگى كەڭەستىڭ وتىرىسىن وتكىزدى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

جيىنعا پرەمەر- مينيستر ب. ساعىنتايەۆ، پرەزيدەنت اكىمشىلىگىنىڭ باسشىسى ءا. جاقسىبەكوۆ، ۇلتتىق بانك ءتوراعاسى د. اقىشيەۆ، «سامۇرىق- قازىنا» اكسيونەرلىك قوعامى باسقارماسىنىڭ ءتوراعاسى ا. ەسىموۆ، پرەمەر- ءمينيستردىڭ ورىنباسارلارى ا. مامين جانە ا. جۇماعاليەۆ، پرەزيدەنتتىڭ كومەكشىسى ءا. سمايىلوۆ، ينۆەستيتسيالار جانە دامۋ ءمينيسترى ج. قاسىمبەك، ۇلتتىق ەكونوميكا ءمينيسترى ت. سۇلەيمەنوۆ، قارجى ءمينيسترى ب. سۇلتانوۆ، ەنەرگەتيكا ءمينيسترى ق. بوزىمبايەۆ، «سامۇرىق- قازىنا» اكسيونەرلىك قوعامىنىڭ تاۋەلسىز ديرەكتورى ر. ەۆانس، ۇلتتىق كومپانيالار مەن كاسىپورىنداردىڭ جەتەكشىلەرى قاتىستى.

باسقوسۋ بارىسىندا «سامۇرىق- قازىنا» اكسيونەرلىك قوعامىنىڭ جاڭارعان دامۋ ستراتەگياسى مەن قوردى ترانسفورماتسيالاۋ باعدارلاماسىن قابىلداۋ ماسەلەلەرى تالقىلاندى.

كەزدەسۋدى اشقان قازاقستان پرەزيدەنتى ۇلتتىق ەكونوميكامىزدى نىعايتۋ جانە ودان ءارى دامىتۋ ىسىندە «سامۇرىق- قازىنا» ءال- اۋقات قورىنىڭ جۇمىسى ستراتەگيالىق ماڭىزعا يە بولىپ وتىرعانىن اتاپ ءوتتى.

«سامۇرىق- قازىنا» ۇلتتىق ءال- اۋقات قورى ەل ەكونوميكاسىندا ماڭىزدى ءرول اتقارادى. قوردى دامىتۋ جونىندەگى العاشقى ۇزاق مەرزىمدى ستراتەگيا 2012 -جىلى قابىلداندى. ول الەمدىك قارجى داعدارىسىنىڭ سالدارىنا قارسى تۇرۋ ماقساتىمەن ازىرلەنگەن بولاتىن. سوڭعى جىلدارى احۋال وزگەردى. ەكونوميكامىز سىرتقى فاكتورلاردىڭ اسەرىنە توتەپ بەرىپ، ورنىقتى دامۋ جولىنا ءتۇستى. كوپ جۇمىس اتقارىلدى، - دەدى ەلباسى.

نۇرسۇلتان نازاربايەۆ قوردى دامىتۋ ءۇشىن اتقارىلعان جۇمىستارعا وڭ باعا بەرىپ، بۇعان دەيىن قابىلدانعان باعدارلامالاردى قازىرگى جاعدايلارعا سايكەس جاڭارتۋ قاجەتتىگىن ايتتى.

«ءبىز ەكونوميكامىزدى ءۇشىنشى جاڭعىرتۋ جولىنا ءتۇسىپ، سيفرلاندىرۋ جونىندەگى جۇمىستارعا بەلسەندى تۇردە كىرىستىك. ەلىمىزدىڭ 2025 -جىلعا دەيىنگى دامۋ ستراتەگياسى قابىلداندى. وسى ورايدا، «سامۇرىق- قازىنا» ۇلتتىق ءال- اۋقات قورىنىڭ جاڭا دامۋ ستراتەگياسىن دا قابىلداۋ قاجەتتىلىگى تۋىنداپ وتىر. سونداي- اق، قوردى ترانسفورماتسيالاۋ باعدارلاماسىن جاڭارتۋ قاجەت. بۇل باعدارلامانىڭ ناتيجەلەرى قور كومپانيالارىنىڭ قىزمەتىندە دە كورىنۋگە ءتيىس، - دەدى مەملەكەت باسشىسى.

وتىرىس بارىسىندا «سامۇرىق- قازىنا» اكسيونەرلىك قوعامى ديرەكتورلار كەڭەسىنىڭ ءتوراعاسى - پرەمەر- مينيستر ب. ساعىنتايەۆتىڭ، «سامۇرىق- قازىنا» اكسيونەرلىك قوعامى باسقارماسىنىڭ ءتوراعاسى ا. ەسىموۆتىڭ، «سامۇرىق- قازىنا» ا ق تاۋەلسىز ديرەكتورى ر. ەۆانستىڭ ەسەپتەرى تىڭدالدى.

جيىنعا قاتىسۋشىلارعا «سامۇرىق- قازىنا» اكسيونەرلىك قوعامىنىڭ 2018-2028 -جىلدارعا ارنالعان جاڭارعان دامۋ ستراتەگياسى جانە ترانسفورماتسيالاۋ باعدارلاماسى تانىستىرىلدى. ادامي كاپيتالدى دامىتۋ جانە قوردىڭ كادر الەۋەتىن ءتيىمدى پايدالانۋ ماسەلەلەرىنە ەرەكشە نازار اۋدارىلدى.

نۇرسۇلتان نازاربايەۆ بايانداماشىلاردى تىڭداپ، جيىنعا قاتىسۋشىلاردىڭ نازارىن ءتيىستى شارالار قابىلداۋدى قاجەت ەتەتىن ءبىرقاتار ماسەلەگە اۋداردى.

«قوردى باسقارۋدىڭ تيىمدىلىگىن ارتتىرۋ ماسەلەسىنە توقتالايىق. قور كومپانيالارىن باسقارۋدىڭ كوپ دەڭگەيلى جۇيەسى ءالى كۇنگە دەيىن ارەكەت ەتىپ كەلەدى. بۇل شەشىمدەر قابىلداۋدى كۇردەلەندىرەدى، سانى كوپ اكىمشىلىك- باسقارۋشىلىق پەرسونالدى ۇستاۋ ءۇشىن ەلەۋلى قارجى رەسۋرستارىن تالاپ ەتەدى. باسقارۋ دەڭگەيلەرىن قىسقارتۋ قاجەت»، - دەدى مەملەكەت باسشىسى.

قازاقستان پرەزيدەنتى سونداي- اق قوردىڭ اكتيۆتەرىن جەكەشەلەندىرۋ جونىندەگى جۇمىستى جالعاستىرۋدىڭ ماڭىزدىلىعىنا نازار اۋدارىپ، بۇل باعدارلاماعا شەتەلدىك ينۆەستورلار زور قىزىعۋشىلىق تانىتىپ وتىرعانىن ايتتى.

نۇرسۇلتان نازاربايەۆ قور كومپانيالارىن سيفرلاندىرۋ ۇدەرىسىنە ارنايى توقتالىپ، ءتورتىنشى ونەركاسىپتىك ريەۆوليۋتسيا جاعدايىندا بۇل باعدارلامانىڭ وزەكتىلىگىن جانە دەر كەزىندە ۇسىنىلىپ وتىرعانىن اتاپ ءوتتى.

بۇدان بولەك، مەملەكەت باسشىسى قوردىڭ ءىرى ينۆەستيتسيالىق جوبالارىنا قاتىستى جۇيەلى شەشىم قابىلداۋ قاجەتتىگىن ايتتى.

جيىن سوڭىندا قازاقستان پرەزيدەنتى «سامۇرىق- قازىنا» اكسيونەرلىك قوعامىنىڭ 2018-2028 -جىلدارعا ارنالعان جاڭارعان دامۋ ستراتەگياسىن جانە قوردى ترانسفورماتسيالاۋ باعدارلاماسىن ماقۇلداپ، ونىڭ ءارى قاراي جۇزەگە اسىرىلۋىن ەرەكشە باقىلاۋعا الۋدى تاپسىردى.

«ۇلتتىق ءال- اۋقات قورىنىڭ جۇمىسى قازاقستاندىقتاردىڭ تۇرمىسىن جاقسارتۋعا جانە ەل ەكونوميكاسىن كوتەرۋگە باعىتتالۋى كەرەك. دامۋدىڭ جاڭا ستراتەگياسى مەن ترانسفورماتسيالاۋ باعدارلاماسى قور جۇمىسىنىڭ تيىمدىلىگىن ارتتىرىپ قانا قويماي، ۇلتتىق ەكونوميكانىڭ ودان ءارى دامۋىنا دا ىقپال ەتەدى. وسىعان وراي ۇكىمەت قور باسشىلىعىمەن بىرلەسىپ، وسى باعدارلامالاردى جۇزەگە اسىرۋ باعىتىندا بەلسەندى جۇمىس جۇرگىزۋى قاجەت»، - دەدى ەلباسى.