قازاقستاندىق ايەل تايلاند اۋرۋحاناسىنان ەلگە جەتكىزىلەدى

استانا. قازاقپارات - ق ر دەنساۋلىق ساقتاۋ مينيسترلىگى تايلاندتىڭ پاتتايا قالاسىنان قازاقستان ازاماتىن تۋعان جەرىندە جەتكىزەدى، دەپ حابارلايدى قازاقپارات.

مينيسترلىكتىڭ مالىمەتىنشە، 2018 -جىلدىڭ 4 - ساۋىرىندە تايلاندتا وتباسىلىق دەمالىستا جۇرگەن 1962 -جىلعى قازاقستان ازاماتشاسى (تەمىرتاۋ تۇرعىنى) ينسۋلت الىپ، پاتتايا قالاسىنىڭ اۋرۋحاناسىنا جاتقىزىلعان.

 «بارلىق قاجەتتى مەديتسينالىق قۇجاتتاما الىنىپ، رەسپۋبليكالىق سانيتارلىق اۆياتسيا ورتالىعى دەڭگەيىندە كوميسسيا وتىرىسى ءوتتتى. وسىدان سوڭ ق ر دەنساۋلىق ساقتاۋ مينيسترلىگى سىرتقى ىستەر مينيسترلىگىمەن بىرلەسىپ، قاجەتتى مەديتسينالىق كومەك الۋى ءۇشىن وتانداسىمىزدى ەلگە جەتكىزۋدى ۇيىمداستىرۋ پروتسەسى بىردەن باستالدى»، - دەپ اتاپ وتەدى ۆەدومستۆودان.

 تاراتىلعان اقپاراتقا قاراعاندا، ناۋقاس وتانداسىمىزدى ەلگە جەتكىزۋ داتاسى ونىڭ دەنساۋلىعىنا تىكەلەي بايلانىستى. دەگەنمەن، وسى ايدىڭ 25-27 - كۇندەرىندە ونى ەلگە جەتكىزۋ جوسپارلانىپ وتىر. ول ەلگە جەتكىزىلگەننەن كەيىن استانا قالاسىنىڭ مەديتسينالىق مەكەمەلەرىندە قاجەتتى كومەك الاتىن بولادى.

 «ناۋقاستى ەلگە جەتكىزۋ سانيتارلىق اۆياتسيانىڭ ارنايى پورتىمەن جۇزەگە اسىرىلادى. ۇشاق قاجەتتى مەديتسينالىق قۇرال- جابدىقپەن جابدىقتالعان، سانيتارلىق اۆياتسيا قىزمەتىنىڭ ۇتقىر بريگاداسى دا بىرگە بولادى. قازىرگى ۋاقىتتا ازاماتشا دارىگەرلەردىڭ تۇراقتى باقىلاۋىنا الىنعان»، - دەلىنگەن تاراتىلعان مالىمەتتە.

ايتا كەتەرلىگى، وسى جىلدىڭ باسىندا ەلىمىزدىڭ دەنساۋلىق ساقتاۋ مينيسترلىگى شەتەلدە دەنساۋلىعى ناشارلاپ كەتكەن قازاقستان ازاماتىن ۇشاقپەن الىپ كەلگەن ەدى. ناۋقاستاردى ەلگە جەتكىزۋگە جۇمسالعان بارلىق شىعىندار رەسپۋبليكالىق بيۋدجەت ەسەبىنەن وتەلدى.

اۆتور: مارلان جيەمباي