قازاقستان پرەزيدەنتى ۇلتتىق بانك قىزمەتىنىڭ قورىتىندىلارى جونىندە كەڭەس وتكىزدى

استانا. قازاقپارات - قازاقستان پرەزيدەنتى ۇلتتىق بانك قىزمەتىنىڭ قورىتىندىلارى جونىندە كەڭەس وتكىزدى. بۇل تۋرالى قازاقپارات اقوردانىڭ باسپا ءسوز قىزمەتىنە سىلتەمە جاساپ حابارلايدى.

جيىن بارىسىندا مەملەكەت باسشىسىنا ۇلتتىق بانكتىڭ 2017 -جىلعى اتقارعان جۇمىستارى جونىندە ەسەپ بەرىلىپ، ەلىمىزدىڭ قارجى سەكتورىنىڭ دامۋ پەرسپەكتيۆالارى باياندالدى.

ەلباسى ماكرو ەكونوميكالىق كورسەتكىشتەردىڭ جاقسارعانىن جانە ينفلياتسيانىڭ بەلگىلەنگەن مەجەدەن اسپاعانىن اتاپ ءوتىپ، بانك جۇيەسىنە مەملەكەتتىڭ قولداۋ كورسەتىپ جاتقانىنا، سونداي- اق رەتتەۋشى تاراپىنان قارجى ينستيتۋتتارىنىڭ قىزمەتىن قاداعالاۋدى كۇشەيتۋ قاجەتتىگىنە نازار اۋداردى.

«مەملەكەت 3 تريلليون تەڭگەدەن استام قاراجات ءبولىپ، بانك جۇيەسىنە بۇرىن- سوڭدى بولماعان قولداۋ كورسەتتى. بۇل رەتتە، بانكتەر تاراپىنان بەرىلگەن نەسيەنىڭ كولەمى ارتپاي، 2017 -جىلدىڭ سوڭىندا 12,7 تريلليون تەڭگەنى قۇراعان. «جۇمىس ىستەمەيتىن» نەسيەنىڭ ۇلەسى - 10 پايىز. بيىل كورسەتكىشتەرى وتە ناشار بانكتەردى ساۋىقتىرۋ جونىندەگى ۇلتتىق بانك باعدارلاماسى توقتاتىلادى. اكسيونەرلەرى دۇرىس باسقارا الماعاندىقتان بۇل بانكتەر قارىزعا باتىپ، سالىمشىلار الدىندا ءوز مىندەتتەمەلەرىن ورىنداي المادى. سول سەبەپتى كورسەتكىشتەرى ناشار بولدى. بۇل جاعدايدان قالاي شىعۋعا بولادى؟ بۇل بانكتەردى ساقتاپ قالۋ ءۇشىن اكسيونەرلەر وزدەرىنىڭ جەكە قاراجاتىن قۇيىپ، كەزىندە ولاردان شىعارىپ العان قارجىنى قايتارۋعا ءتيىس، - دەدى مەملەكەت باسشىسى.

نۇرسۇلتان نازاربايەۆ قازاقستان حالقىنا ارناعان جولداۋىندا جانە «بەس الەۋمەتتىك باستاماسىندا» كورسەتىلگەن قارجى سەكتورىن قايتا جاڭعىرتۋ جونىندەگى شارالارعا توقتالدى.

«بۇگىندە ەكونوميكانى ۇزاق مەرزىمدى نەسيەمەن قامتاماسىز ەتۋ ماسەلەسى شەشىمىن تاپپاي وتىر. قور نارىعىن جانداندىرۋ كەرەك، سونداي- اق بانك جۇيەسىندە تۋىنداعان جاعدايلاردى ۋاقتىلى باعامداپ، ءتيىمدى ارەكەت ەتۋ قاجەت. بۇگىن پارلامەنتتە تالقىلانىپ جاتقان ۆاليۋتالىق رەتتەۋ تۋرالى زاڭعا ەنگىزىلەتىن وزگەرىستەردىڭ قابىلدانۋىنا بايلانىستى «7-20-25» باعدارلاماسى اياسىندا اتقارىلاتىن جۇمىستى بيىل باستاۋ كەرەك. مەن قوس پالاتا دەپۋتاتتارىنان بۇل ماسەلەنى وسى سەسسياسىنىڭ سوڭىنا دەيىن تەزدەتىپ قاراستىرۋدى سۇرايمىن. بۇل ءاربىر ازاماتىمىزعا ارنالعان مەنىڭ «بەس الەۋمەتتىك باستامامدى» ىسكە اسىرۋ ءۇشىن ماڭىزدى»، - دەدى مەملەكەت باسشىسى.

دانيار اقىشيەۆ 2017 -جىلى ۇلتتىق بانكتىڭ قىزمەتى نارىقتاعى باعالاردىڭ تۇراقتىلىعىن قامتاماسىز ەتۋگە جانە بانك سەكتورىنىڭ جۇمىسىن ءبىر قالىپقا كەلتىرۋگە باعىتتالعانىن اتاپ ءوتتى.

«قارجى نارىعىنداعى جاعداي قالىپتى. ماكروەكونوميكالىق كورسەتكىشتەر مەن قارجى سەكتورىنىڭ دامۋ ينديكاتورلارى تۇراقتى تۇردە جاقسارىپ كەلەدى. 2018 -جىلى ينفلياتسيا 5-7 پايىز شاماسىندا بولادى دەپ ويلايمىز. بيىلعى اقپان ايىنىڭ سوڭىنداعى جاعدايعا سايكەس، زاڭدى تۇلعالارعا تەڭگەمەن بەرىلەتىن نەسيە ستاۆكاسى 12,9 پايىزعا دەيىن تومەندەدى»، - دەدى ۇلتتىق بانك ءتوراعاسى.

بۇدان بولەك، دانيار اقىشيەۆ تەڭگەنىڭ ايىرباس باعامىنداعى احۋال مەن وعان ىقپال ەتكەن ىشكى جانە سىرتقى فاكتورلارعا تۇسىنىك بەردى.

«وتكەن اپتادا جەكەلەگەن رەسەيلىك كومپانيالار مەن تۇلعالارعا قاتىستى ا ق ش- تىڭ ەكونوميكالىق سانكسيالارىن كەڭەيتۋىنە بايلانىستى وقيعالار بولدى. تيىسىنشە رەسەيدىڭ قور جانە ۆاليۋتا نارىعىندا بەلگىلى ءبىر وزگەرىستەر ورىن الدى. ارينە، ولار قازاقستاننىڭ دا ۆاليۋتا نارىعىنا اسەر ەتتى جانە بۇل ەركىن باعام جاعدايىندا قالىپتى نارسە سانالادى. ءبىراق بۇعان دەگەن نارىقتىڭ اسەرى تۋرا پروپورتسيونالدى بولعان جوق. ەگەر رۋبل باعامى 10 پايىزدان استام قۇلدىراسا، تەڭگە نومينالدى تۇردە ايتساق، 3 پايىزعا عانا تومەندەدى»، - دەدى ۇلتتىق بانك ءتوراعاسى.

جيىن سوڭىندا مەملەكەت باسشىسى ۇلتتىق بانك جۇمىسىنىڭ جاقسارا تۇسكەنىن اتاپ ءوتىپ، ءبىرقاتار ناقتى تاپسىرما بەردى.