ءماجىلىس بيۋدجەتكە ەنگىزىلەتىن تۇزەتۋلەردى ماقۇلدادى
وتىرىستا بايانداما جاساعان قارجى ءمينيسترى باقىت سۇلتانوۆ قۇجاتتىڭ ماقساتى - قاتاڭ فيسكالدىق شەكتەۋلەر مەن بيۋدجەتكە مۇنايلىق ەمەس تۇسىمدەردى ۇلعايتىپ، مەملەكەت باسشىسىنىڭ جولداۋلارىن، بەس الەۋمەتتىك باستاماسىن تولىق ورىندالۋىن قامتاماسىز ەتۋ ەكەنىن اتاپ ءوتتى.
«ناقتىلانعان بيۋدجەتتىڭ مىندەتتەرىن ىسكە اسىرۋعا ارنالعان رەسۋرستار رەتىندە ءۇش باعىت بويىنشا شوعىرلاندىرىلعان قاراجات بار. ءبىرىنشى - ماكروەكونوميكالىق بولجامدى تۇزەتۋ ناتيجەسىندە 181 ميلليارد تەڭگە مولشەرىندەگى رەسپۋبليكالىق بيۋدجەتتىڭ قوسىمشا تۇسىمدەرى. ەكىنشى، بىلتىرعى بيۋدجەتتەن قالعان 125 ميلليارد تەڭگە كولەمىندەگى ءتيىستى قالدىقتار. ءۇشىنشى، 118 جارىم ملرد تەڭگە سوماسىنداعى بورىشتىق باعالى قاعازداردى شىعارۋ. بەكىتىلگەن بيۋدجەت كىرىستەرىندە سالىقتاردى جيناۋ جوباسىن اسىرۋ بويىنشا ازىرلەنگەن جوسپارلار ەسەپكە الىندى» ، - دەدى مينيستر.
باقىت سۇلتانوۆ قارجى مينيسترلىگىنىڭ جانىندا قۇرىلعان جوبالىق كەڭسە سالىقتىق جانە كەدەندىك تولەمدەردى جيناۋ دەڭگەيىن كوتەرۋدى كوزدەپ وتىرعانىن جەتكىزدى.
«وسى جوسپارلاردىڭ ماڭىزدى ەلەمەنتى - بيزنەسكە تۇسەتىن اكىمشىلىك جۇكتەمەنى تومەندەتۋ بولىپ تابىلادى. ماسەلەن، 2017 -جىلى تەكسەرىستەر سانى 45 پايىزعا قىسقارتىلدى. بۇل جۇمىستا اقپاراتتىق تەحنولوگيالاردى ەنگىزۋ ەكپىن جاسالادى. مىسالى، وتكەن جىلدىڭ ءۇشىنشى توقسانىنان جانە اعىمداعى جىلدىڭ 1 - ساۋىرىنەن باستاپ، «استانا - 1» اقپاراتتىق جۇيەنىڭ ترانزيت، ەكپورت جانە يمپورت بويىنشا كەدەن ورگاندارىنىڭ بيزنەس- پروتسەستەرىن اۆتوماتتاندىراتىن مودۋلدەر ىسكە قوسىلدى. ناتيجەسىندە، كەدەندىك تازارتۋدىڭ ورتاشا ۋاقىتى 105 مينۋتتان 7-15 مينۋتقا دەيىن قىسقارتىلدى» ، - دەدى ول.
سۇلتانوۆتىڭ ايتۋىنشا، اعىمداعى جىلدىڭ 181 ميلليارد تەڭگە قوسىمشا تۇسىمدەرى قاجەتتى شىعىستاردىڭ 44 پايىزىن عانا جابادى. ناتيجەسىندە، رەسپۋبليكالىق بيۋدجەت شىعىستارى اقپان ايىندا ۇكىمەت تۇزەتكەن بيۋدجەتتەن 417 ميلليارد تەڭگەگە، ال جالپى بەكىتىلگەن بيۋدجەتتەن 425 ميلليارد تەڭگەگە وسەدى.
«اتالعان شىعىستاردى 3 نەگىزگى باعىت بويىنشا ءبولۋ ۇسىنىلادى. ءبىرىنشى مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەلەستىك قابىلەتتىلىك» جانە «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋلارىن ىسكە اسىرۋعا 293 ميلليارد تەڭگە كوزدەلەدى. ەكىنشى، 25 ميلليارد تەڭگە پرەزيدەنتتىڭ بەس الەۋمەتتىك باستاماسىن جۇزەگە اسىرۋعا بولىنەدى. ۇشىنشىدەن، بۇرىن قابىلدانعان مىندەتتەردى ىسكە اسىرۋعا 99 ميلليارد تەڭگە باعىتتاۋ ۇسىنىلادى» ، - دەدى باقىت سۇلتانوۆ.
پالاتا دەپۋتاتتارى «2018-2020 -جىلدارعا ارنالعان رەسپۋبليكالىق بيۋدجەت تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى.
