قازاقستاننىڭ قارۋلى كۇشتەرى اسكەري پارادقا دايىندىقتى باستادى

استانا. قازاقپارات - قازاقستاننىڭ قارۋلى كۇشتەرىندە اسكەري پارادقا دايىندىق باستالدى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

«قازىرگى تاڭدا «وتار» 40- اسكەري بازا اۋماعىندا قازاقستان رەسپۋبليكاسى قارۋلى كۇشتەرىنىڭ اسكەري بولىمدەرى مەن قۇرىلىمدارىنىڭ جەكە قۇرامى مەن اسكەري تەحنيكاسى جينالىپ جاتىر» ، - دەلىنگەن ۆەدومستۆونىڭ حابارلاماسىندا.

اسكەري بولىمدەر وتان قورعاۋشىلار كۇنىن مەرەكەلەۋ قارساڭىندا «ماتىبۇلاق» پوليگونىندا ق ر قارۋلى كۇشتەرىنىڭ جابدىقتالعان قازىرگى زامانعى قارۋ- جاراقتارى مەن اسكەري تەحنيكاسىن تاكتيكالىق جانە پراكتيكالىق قولدانىلۋى بارىسىندا ءوز شەبەرلىكتەرىن كورسەتەدى.

پسيحولوگيالىق جانە اسكەري دايىندىعى تۇرعىسىنان ەڭ جاقسى دايىندالعان اسكەري قىزمەتشىلەردى ىرىكتەۋ جەر- جەرلەردەگى پۋنكتتەردە جۇزەگە اسىرىلدى.

جاتتىعۋ بارىسىندا سالتاناتتى قوراپتاردى ورنالاستىرۋ رەتى جاسالىپ، پارادقا قاتىسۋشىلاردىڭ قۇتتىقتاۋ ەلەمەنتتەرى ىرىكتەلدى، تۋ الىپ ءوتۋ، سونداي- اق جەكە قۇرامنىڭ سالتاناتتى مارشپەن ءجۇرۋ ءتارتىبى انىقتالدى. پارادقا دايىندىقتى قامتاماسىز ەتۋ ءۇشىن تۇرۋعا قاجەتتى بارلىق جاعدايلارى بار لاگەرلەر تىگىلدى.

 2018 -جىلى اسكەري پارادقا 3 مىڭ اسكەري قىزمەتشى، 300 دەن استام قارۋ- جاراق پەن اسكەري تەحنيكا، 30 ۇشاق قاتىستىرىلادى.

 ەسكە سالا كەتسەك، 2013 -جىلى «وتار» 40- اسكەري بازاسىندا قازاقستان قارۋلى كۇشتەرى تاريحىندا العاش رەت اسكەري پاراد وتكەن بولاتىن. شاراعا قازاقستان پرەزيدەنتى - ق ر قارۋلى كۇشتەرىنىڭ جوعارعى باس قولباسشىسى نۇرسۇلتان نازاربايەۆ قاتىستى.