مىرزالينگە استانا توڭىرەگىندەگى دەمالۋ ورنى تانىستىرىلدى

كوكشەتاۋ. قازاقپارات - اقمولا وبلىسىنىڭ تاجىريبەلىك وق اتۋ قاۋىمداستىعىنىڭ باسشىسى رۋسلان شامكەنوۆ وبلىس اكىمىنە استانا توڭىرەگىندەگى دەمالۋ ورنىن تانىستىردى،

 دەپ حابارلايدى قازاقپارات ءتىلشىسى ايماق باسشىسىنىڭ تۋريزم جونىندەگى كەڭەسشىسى مارات يعاليگە سىلتەمە جاساپ.

«بەيبارىس» دەمالۋ ايماعى استانا قالاسىنان قاراعاندى باعىتىندا 15 شاقىرىم قاشىقتىقتا ورنالاسقان. بيىلعى جازدا ەلوردا تۇرعىندارى وسى جەرگە بارىپ، تازا تابيعات اياسىندا دەمالۋىنا بولادى.

«مەملەكەت باسشىسىنىڭ تاپسىرماسىنا سايكەس، اقمولا وبلىسىنىڭ اكىمى مالىك مىرزالين استانا توڭىرەگىندە قالا تۇرعىندارى مەن قوناقتارى ءۇشىن دەمالۋ بازاسىن قۇرۋ جونىندە مىندەت قويىپ وتىر. كوپشىلىك بۋرابايعا بارىپ، دەمالا المايدى. ال، مىندا دەمالۋ ورنىنا اينالاسى 15-20 مينۋتتا جەتۋگە بولادى. مەن ءوزىم وسى بازادا بولىپ، زامانۋي ستاندارتتارعا ساي جابدىقتالعان قازىرگى زامانعى قۇرالداردى كوزبەن كوردىم. شىنىمەن دە، «بەيبارىس» قالالىقتاردىڭ دەمالاتىن سۇيىكتى ورنىنا اينالاتىنى ءسوزسىز. كەلەشەكتە ءبىز وسى جەردە حالىقارالىق جارىستار وتكىزەتىن بولامىز. جالپى، وسىنداي نىساندار بارلىق جەردە بولۋى ءتيىس»، دەپ اتاپ ءوتتى مارات يعالي قازاقپارات تىلشىسىنە.

نىساندا اسكەري تەحنيكالارمەن ويناۋ ءۇشىن ءبىر گەكتار جەر تەلىمى بولىنگەن. وندا سترايكزونا - «CS De_Dust 2» جاڭا پوليگونى بۇل تانىمال CounterStrike ويىنى كارتاسىنىڭ كوشىرمەسى.

ال جالپى دەمالۋ ايماعىنا كەلەتىن بولساق، ورماندى الاڭقاي، قوناقۇي، مەيرامحانا كەشەنى بار. دەمالۋ ايماعىنىڭ جالپى كولەمى 10 گەكتار جەردى الىپ جاتىر. مۇندا ۇلكەندەر مەن بالالاردىڭ دا كەلىپ دەمالۋىنا بولادى. ولارعا بارلىعى 30 ءتۇرلى قىزمەت ۇسىنىلادى.

اۆتور: اسلان وسپانوۆ