داۋرەن ابايەۆ قازاقستان سيفرلىق حابار تاراتۋعا تولىعىمەن قاشان كوشەتىنىن ايتتى
بۇل تۋرالى مينيستر فەيسبۋكتەگى ءوز پاراقشاسىندا جاريالانعان ۆيدەودا ايتىپ بەردى، دەپ حابارلايدى قازاقپارات ءتىلشىسى.
«تەلەراديو حابارلارىن تاراتۋ تۋرالى» زاڭعا سايكەس مەملەكەت جارتى جىل كولەمىندە ەفيرلىك سيفرلىق تەلەراديو حابار تاراتۋعا اۋىسۋدىڭ ۋاقىتىن بەلگىلەۋى قاجەت»، - ءوز پاراقشاسىندا وسىنداي جازبامەن ۆيدەوجولداۋ تاراتقان ۆەدومستۆو باسشىسى، بۇگىندە سيفرلىق ەفيرگە اۋىسۋ جۇمىستارى قالاي جۇرگىزىلىپ جاتقانىن بايان ەتتى.
«سيفرلىق تەليەۆيدەنيە دەگەن نە؟ بۇل ۆيدەوبەلگى مەن دىبىس تاراتۋدىڭ جوعارى ساپاسى. سونداي- اق، ۆيزۋالدى كەدەرگىلەردى جويىپ، ەفيردەگى تۇنىق دىبىستى قامتاماسىز ەتەدى. وسىلايشا، وتاندىق تەلەارنالاردى اقىسىز سيفرلىق ساپادا تاماشالاۋ مۇمكىندىگى تۋادى. استانا مەن الماتى قالالارىندا، وبلىس ورتالىقتارىندا 30 ارناعا دەيىن كورۋگە بولادى. كەزىندە ەلىمىزدىڭ ەڭ شالعاي ەلدى مەكەندەرى جانە تۇرعىندارى از قونىستانعان اۋىلداردا 2-3 ارنانى عانا كورۋگە مۇمكىندىك بار ەدى. ەندىگىدە، 15 وتاندىق تەلەارنانى جوعارى ساپادا تاماشالايتىن بولادى»، - دەيدى مينيستر.
داۋرەن ابايەۆتىڭ ايتۋىنشا، سيفرلىق حابار تاراتۋدى ەنگىزۋ قالا مەن اۋىل اراسىنداعى اقپاراتتىق الشاقتىقتى تومەندەتەدى.
«تۋرا التى ايدان سوڭ ماڭعىستاۋ وبلىسى تولىق سيفرلىق حابار تاراتۋعا كوشەدى. ەكى جىل ىشىندە وزگە ايماقتار دا سيفرلىق حابار تاراتۋمەن قامتاماسىز ەتىلەدى. انالوگتىق حابار تاراتۋ كەزەڭ-كەزەڭىمەن توقتاتىلادى. بۇل - ۇلكەن ءارى زور ەڭبەكتى تالاپ ەتەتىن جۇمىس. كەلىسىپ پىشكەن تون كەلتە بولمايدى. بىرىكسەك - الىنبايتىن قامال جوق»، - دەپ ءتۇيدى ابايەۆ.
اتاپ وتىلگەندەي، جوبا بويىنشا 827 راديو جانە تەلەديدار ستانساسىن سالۋ جانە جاڭعىرتۋ جۇمىستارى جوسپارلانعان. 2012 -جىلى باستالعان قۇرىلىس جۇمىستارىنىڭ ارقاسىندا بۇگىنگى تاڭدا 356 ستانسا سالىنعان. جىلدىڭ سوڭىنا دەيىن تاعى 292 ستانسانىڭ قۇرىلىسىن اياقتاۋ جوسپارلانىپ وتىر. ول حالىقتىڭ 94 پايىزىن سيفرلىق حابار تارالىمىمەن قامتۋعا مۇمكىندىك بەرەدى. قالعان 179 ستانسانى 2019-2020 -جىلدارى پايدالانۋعا بەرۋ كوزدەلۋدە.
