قالمۇحانبەت قاسىموۆ قازاقستانعا شەتەلدىكتەردىڭ ساپارلاۋى ءتارتىبىن ءتۇسىندىردى
«قازىر ەلىمىزدە دەپۋتاتتىق كورپۋستىڭ بەلسەندى قاتىسۋى مەن قولداۋى ارقاسىندا جاڭا ميگراتسيالىق ساياسات قالىپتاستى، بۇل حالىقارالىق ستاندارتتارعا ساي كەلەدى. شەتەلدىك جۇمىس كۇشىن تارتۋ كۆوتا بەرۋ تەتىگى ارقىلى جۇزەگە اسادى. بۇل ماماندار قۇرىلىس سالاسىندا، ونەركاسىپ، اۋىل شارۋاشىلىعى جانە باسقا دا سالالاردا جۇمىس ىستەيدى. سونىمەن قاتار زاڭ بويىنشا ناقتى ينۆەستيتسيالىق جوبالاردى ىسكە اسىرۋ ءۇشىن شەتەلدىك كاسىبي جۇمىسشىلاردى كۆوتاسىز ءارى رۇقساتسىز تارتۋعا مۇمكىندىك بار. ءار مەملەكەت ازاماتتارىنىڭ ەلىمىزگە كەلۋ مەن تىركەلۋ ءراسىمى ءارتۇرلى. قازاقستانعا كىرۋ ءۇشىن ولاردىڭ كوبىنە ۆيزا كەرەك. 19 ەلمەن جالپى ازاماتتىق پاسپورتتار بويىنشا كەلۋدىڭ ۆيزاسىز ءتارتىبى تۋرالى كەلىسىم جاسالدى. ولاردىڭ قاتارىندا ەۋرازيالىق ەكونوميكالىق وداق ەلدەرى دە بار. 45 ەلدىڭ ازاماتتارى 30 كۇنگە دەيىن ۆيزا راسىمىنەن جانە تىركەلۋدەن بوساتىلعان»، - دەپ ناقتىلادى مينيستر.
2016-جىلعى شىلدەدەن باستاپ قىتاي ازاماتتارىنىڭ قازاقستان رەسپۋبليكاسىنا توپتاسىپ تۋريستىك ساپارلارىن جەڭىلدەتۋ تۋرالى مەموراندۋم قولدانىلا باستادى. مۇنىمەن قوسا، شەتەلدىك ينۆەستورلار ءۇشىن جاعداي جاساۋعا ەرەكشە نازار اۋدارىلۋدا. ينۆەستورلىق ۆيزا 3 جىلعا بەرىلەدى. ينۆەستورلاردان ىشكى ىستەر ورگاندارىندا تىركەلۋ تالاپ ەتىلمەيدى.
«سوڭعى جىلدارى شەتەلدىكتەردى تىركەۋ ءراسىمىن ءبىرشاما جەڭىلدەتتىك. ەكونوميكالىق دامىعان جانە ساياسي تۇراقتى 56 ەلدىڭ ازاماتتارى شەكارادان وتكەن بويىندا كەدەن قىزمەتىندە تىركەلە الادى. بۇل ولاردى كوشى-قون قىزمەتىنە كەلىپ، تىركەلۋدەن بوساتادى»، - دەپ ءتۇسىندىردى قاسىموۆ.
سونىمەن قاتار ول ەۋرازيالىق ەكونوميكالىق وداق ەلدەرى مەن تاجىكستان ازاماتتارى ەرەكشە مارتەبەگە يە ەكەنىن ەسكە سالىپ ءوتتى. ولار شەكارادان وتكەننەن باستاپ 30 كۇنگە دەيىن تىركەلۋدەن بوساتىلادى. ە ا ە و ەلدەرى ازاماتتارىنا ءبىزدىڭ مەملەكەتىمىزدە جۇمىس ىستەۋى ءۇشىن رۇقسات كەرەك ەمەس. وتكەن جىلدان باستاپ شەتەل ازاماتتارىن قابىلدايتىن بارلىق زاڭدى ءارى جەكە تۇلعالار ولاردى «ەلەكتروندىق ۇكىمەت» پورتالى ارقىلى تىركەۋگە مۇمكىندىك الدى.
