قازاقستاندىق اۆياتسياداعى ۇشۋ بيىكتىگىنىڭ ولشەمى فۋتتىق جۇيەگە كوشەدى

استانا. قازاقپارات - قازاقستاننىڭ اۆيتسيا سالاسىنداعى ۇشۋ بيىكتىگىنىڭ ولشەمى فۋتتىق جۇيەگە كوشىرىلمەك، دەپ حابارلايدى قازاقپارات ءتىلشىسى ق ر ي د م ازاماتتىق اۆياتسيا كوميتەتىنىڭ فەيسبۋكتەگى پاراقشاسىنا سىلتەمە جاساپ.

حابارلانىپ وتىرعانىنداي، 2018-جىلعى كوكتەمگى- جازعى ناۆيگاتسيا ماۋسىمى قارساڭىندا ق ر ي د م ازاماتتىق اۆياتسيا كوميتەتىنىڭ باستاماسىمەن ازاماتتىق اۆياتسيا ماسەلەلەرى بويىنشا ۇلكەن سالالىق كەڭەس وتكەن. ق ر باس كولىك پروكۋراتۋراسى اتىنان الماتى قالاسىنىڭ اۆياتسيالىق پروكۋرورى، شاعىن اۆياتسيا پايدالانۋشىلارى، اۋە كومپانيالارىنىڭ جانە اۋەجايلاردىڭ 90 نان استام وكىلى قاتىستى.

ازاماتتىق اۆياتسيا كوميتەتىنىڭ ءتوراعاسى تالعات لاستايەۆ كەڭەسكە قاتىسۋشىلاردى سوڭعى ۋاقىتتاعى سالاداعى جەتىستىكتەرمەن تانىستىردى. كوميتەت ءوز قىزمەتىن الەمدەگى ەڭ وزىق بولىپ تابىلاتىن بريتاندىق ۇلگىگە سايكەستەندىرۋ پروتسەسىنە كىرىسكەندىگى تۋرالى ەرەكشە اتالىپ ءوتتى. وزگەرىستەر تەك كوميتەتتىڭ قۇرىلىمىن عانا ەمەس، نەگىزگى قاداعالاۋ جانە باقىلاۋ فۋنكتسيالارىن دا قامتىماق.

ازاماتتىق اۆياتسيا كوميتەتى باسشىلىعى ۇشۋدى ورىنداۋ ەرەجەلەرىندەگى جانە نورماتيۆتىك قۇجاتتارداعى جوسپارلانىپ وتىرعان نەگىزگى وزگەرىستەرمەن تانىستىرىپ، كوميتەت تاراپىنان اۋە كەڭىستىگىن پايدالانۋ بويىنشا زاڭدى بۇزۋشىلارعا قاتاڭ شارالار قولدانۋ، ءتىپتى پايدالانۋشىنىڭ سەرتيفيكاتىن قايتارىپ الۋ تۋرالى حاباردار ەتتى.

«ەڭ باستى وزگەرىستەردىڭ ءبىرى - جۋىق ارادا ۇشۋ بيىكتىگىن ولشەۋ «فۋتتىق» (1 فۋت - 0,3048 مەتر - اۆت.) جۇيەگە كوشەتىن بولادى. بۇل رەتتە، شاعىن اۆياتسيا ءۇشىن قوسىمشا سۇراۋلارى بويىنشا مەترلىك جۇيەدە ۇشۋعا رۇقسات بەرۋ مۇمكىندىگى قاراستىرىلىپ وتىر. اۆياتسيالىق كادرلاردى دايارلاۋ جۇيەسىنە تۇبەگەيلى وزگەرىستەردى ەنگىزۋ بويىنشا ۇسىنىستار بەرىلدى. كەيبىر ماماندىقتار بويىنشا وقۋ باعدارلامالارى تولىعىمەن ەۋروپالىق ستاندارتتارعا سايكەستەندىرىلگەن»، - دەلىنگەن حابارلامادا.

اۆتور: ايان بەكەن ۇلى