ءجۇز ەسىم: اۋىلدان شىققان بوكسشى قىز دينا جولاماننىڭ جولى

كوكشەتاۋ. قازاقپارات - اقمولا وبلىسىنىڭ شاعىن عانا اۋىلىنان تۇلەپ ۇشقان بىلعارى قولعاپ شەبەرى دينا جولاماننىڭ ەسىمى قازىر سپورت سۇيەر قاۋىمعا جاقسى تانىس.

الەمدىك دودالاردا ەل نامىسىن ابىرويمەن قورعاپ جۇرگەن قازاقتىڭ جاۋقازىن قىزى دينانىڭ وسى كۇنى قارقىنى كۇشتى، دەپ حابارلايدى قازاقپارات ءتىلشىسى.

ايەلدەر اراسىنداعى بوكس بۇگىندە وليمپيادالىق ويىندار تىزىمىنە ەنگەن سپورتتىڭ ەڭ تانىمال ءتۇرى بولىپ سانالادى. دينانىڭ بوكستاعى جولى جاقسى كەنتىندە اشىلعان ت. ۋاليەۆ اتىنداعى سپورت مەكتەبىندە باستالعان. سپورتشىنىڭ الەم چەمپيونىنا دەيىنگى جولى بىردەن جانە كەزدەيسوق سامعاۋ ارقىلى ەمەس، ساتىلاپ وسۋمەن جانە تىنىمسىز جاتتىعۋدىڭ ارقاسىندا كەلدى. وسىدان ون شاقتى جىل بۇرىن دينانىڭ ءدال وسىنداي بيىككە قول جەتكىزەتىنىنە نىق سەنىمدى بولعان ونىڭ جاتتىقتىرۋشىسى الەكساندر ۆىسوتسكي ەدى.

«قولىما بىلعارى قولعاپ كيىپ، بوكسشى بولامىن دەپ كەلگەن مەنىڭ تالابىمدى ءوسىرىپ، بولاشاعىما زور سەنىم ارتقان جاتتىقتىرۋشى الەكساندر ۆىسوتسكيگە ايتار العىسىم شەكسىز. وسى كىسىنىڭ ارقاسىندا كوپتەگەن حالىقارالىق، رەسپۋبليكالىق جارىستاردا توپ جارىپ، ەلدىڭ سۇيىكتىسىنە اينالدىم»، - دەيدى بوكسشى قىز.

قىزداردىڭ اۋىر اتلەتيكا، بوكس سياقتى ۇلكەن كۇشتى قاجەت ەتەتىن سپورت تۇرلەرىمەن اينالىسۋى بۇگىندە ەشكىمنىڭ تاڭدانىسىن تۋدىرمايدى. سودان بولار، ونىڭ بوكسپەن اينالىسقانىنا تۋعان-تۋىستارى دا قارسى بولا قويماعان.

«بوكسپەن 13 جاسىمنان بەرى اينالىسىپ كەلەمىن. سول جىلدارى جاقسى اۋدانىنداعى «ت ن ك اگروفيرماسىنىڭ» قولداۋىمەن ت. ۋاليەۆ اتىنداعى سپورت مەكتەبىندە قىزدار بوكسىنان ۇيىرمە اشىلدى. سىنىپتاس قىزدارمەن ەرىپ بارعان ەدىم، باسىندا جاي قىزىعۋشىلىعىم باسىم بولدى. كەيىن تىلسىم سىرعا تولى عاجايىپ سپورت الەمى وزىنە باۋراي ءتۇستى. انام مەنىڭ بۇل تاڭداۋىما قارسىلىق بىلدىرگەن جوق. كەرىسىنشە، قولداۋ كورسەتتى. وسىلايشا، بىلعارى قولعاپتى مىقتاپ قولىما كيدىم»، - دەيدى دينا جولامان.

ەكى دۇركىن رەسپۋبليكا چەمپيونى بولعان دينا 2014-جىلى وڭتۇستىك كورەيادا وتكەن حالىقارالىق جارىستا بەسىنشى ساتىدان كورىنىپ، بولاشاعىنان ۇلكەن ءۇمىت كۇتتىرەتىن سپورتشى ەكەنىن كورسەتتى. مۇنداي ءدۇبىرلى جارىسقا العاش قاتىسقان جاس سپورتشى ءۇشىن بۇل از تابىس ەمەس. سونداي-اق، بۇل جەتىستىك وعان حالىقارالىق دارەجەدەگى سپورت شەبەرى اتاعىن الۋعا ىقپالىن تيگىزدى. 2016-جىلى استانادا وتكەن جارىسقا قايتا ورالساق، بۇل - ءدال وليمپيادا ويىندارى قارساڭىندا وتكەن اسا جاۋاپتى دا، كۇردەلى سىن بولعان ەدى. جارىس جۇلدەگەرى وليمپياداعا جولداما دا الۋى ءتيىس-ءتىن. سوندىقتان سپورتشىلار جەڭىس ءۇشىن جانىن سالىپ باقتى. دينانىڭ قارسىلاستارى تالاي جارىستاردا توپ جارعان كىل مىقتىلار بولدى. دەگەنمەن، ولاردىڭ اتاق-داڭقى، بۇرىنعى جەڭىستەرى جاس بوكسشىنىڭ بويىنا ۇرەي ۇيالاتا قويعان جوق. نەمىس سپورتشىسى ورنەلەي ۆاحنەردى 3:0 ەسەبىمەن ۇتقان ول، قىتايلىق ايا شينماتونى دا سونداي ەسەپپەن تىزە بۇكتىردى. فينالدا تاعى ءبىر قىتايلىق ليۋ پياپياونى دا 3:0 ەسەبىمەن انىق باسىمدىقپەن جەڭدى.

ءسويتىپ، ەلىمىز تاريحىندا ايەلدەر اراسىندا ەكىنشى الەم چەمپيونى اتاندى. وكىنىشكە وراي، دينا ريو-دە-جانەيرودا وتەتىن وليمپياداعا بارا المادى. ويتكەنى، ونىڭ سالماعى وليمپيادا ويىندارىنا كىرەتىن سالماق ولشەمىنە ەنبەدى. وليمپيادادا ايەلدەر بوكسىندا ءۇش سالماق - 51، 60 جانە 75 كەلى سالماقتارى عانا قاراستىرىلعان ەدى.

دينانىڭ بوكستاعى جەتىستىكتەرى تۋرالى اۋىز تولتىرىپ ايتا بەرۋگە بولادى. سونىڭ ءبىرى، جاقىندا شۋچە قالاسىندا وتكەن قازاقستان رەسپۋبليكاسىنا ەڭبەگى سىڭگەن سپورت شەبەرى، لوندون وليمپياداسىنىڭ قولا جۇلدەگەرى مارينا ۆولنوۆانىڭ جۇلدەسى ءۇشىن ايەلدەر اراسىندا بوكستان حالىقارلىق تۋرنيردە ديانانىڭ باعى جانعان بولاتىن. العاشقى بولىپ شارشى الاڭعا شىققان ول 54 كەلى سالماقتا گۇلميرا بايمانوۆادان ايلاسىن اسىرا ءبىلدى.

حالىقارلىق دارەجەدەگى سپورت شەبەرى، قازاقستان رەسپۋبليكاسىنا ەڭبەگى سىڭگەن سپورت شەبەرى، قىزدار اراسىنداعى بوكستان الەم چەمپيونى، جاقسى اۋدانىنىڭ قۇرمەتتى ازاماتى، سونداي-اق «قازاقستاننىڭ 100 جاڭا ەسىمى» تىزىمىنە ەنگەن دينانى الدا تالاي ءدۇبىرلى جارىستار كۇتىپ تۇر. ەل نامىسىن قورعاپ، سول جولدا تەر توگىپ جۇرگەن بوكسشى قىزدى ءالى تالاي بيىكتەن كورەتىنىمىز انىق. لايىم سولاي بولعاي!

اۆتور: اسلان وسپانوۆ