كوكشەتاۋدا بيىك ءۇيدىڭ توبەسىندە سەكىرگەن جاستاردى پوليتسيا ىزدەپ جاتىر

كوكشەتاۋ. قازاقپارات - اقمولا پوليتسياسى كوكشەتاۋداعى ۇيلەردىڭ توبەسىندە ويناپ جۇرگەنىن ۆيدەوعا تۇسىرگەن جاستاردى ىزدەپ جاتىر، دەپ حابارلايدى قازاقپارات ءتىلشىسى.

الەۋمەتتىك جەلىدە كوكشەتاۋداعى ءزاۋلىم ۇيلەردىڭ توبەسىندە سەرۋەندەپ جۇرگەن جاستاردىڭ ۆيدەوسى تارادى. مونتاج ارقىلى اسەم ءان جازىلعان ۆيدەو جۇرتشىلىقتىڭ نازارىن اۋداردى. ويتكەنى جاس جىگىت-قىزدار كوپ قاباتتى ۇيلەردىڭ ۇستىندە ويناپ ءجۇرىپ، ءتىپتى سەكىرەدى.

ۆيدەوعا پىكىر جازعان پايدالانۋشىلار بۇلاي ويناۋ قاۋىپتى ەكەنىن ايتادى.

«ءى ءى د ۆيدەونى تەكسەرىپ جاتىر. ءتۇسىندىرۋ جۇمىستارىن وتكىزۋ ءۇشىن ونداعى جاستاردىڭ تۇلعاسىن انىقتاۋ شارالارى جۇرگىزىلۋدە»، - دەيدى اقمولا وبلىستىق ءى ءى د باسپا ءسوز قىزمەتىنىڭ وكىلدەرى.

سوڭعى جىلدارى الەمدە «رۋفەرلەر» دەگەن ەرەكشە سۋبمادەنيەت قالىپتاستى. رۋفەرلەر عيماراتتاردىڭ بىرىنەن ەكىنشىسىنە سەكىرىپ، اسىر سالىپ جۇرەدى.