دەنساۋلىق ساقتاۋ مينيسترلىگى ءسۋشيدىڭ نەسىمەن زيان ەكەنىن ايتىپ بەردى
دەنساۋلىق ساقتاۋ مينيسترلىگى ءسۋشيدىڭ نەسىمەن زيان ەكەنىن ايتىپ بەردى
دەنساۋلىق ساقتاۋ مينيسترلىگى جانىنداعى قوعامدىق دەنساۋلىق ساقتاۋ كوميتەتىنىڭ باسپا ءسوز قىزمەتى مالىمدەگەندەي، ساپالى ونىمدەردەن دايىندالعان سۋشي مەن روللدار ادام اعزاسىنا پايداسىن اكەلۋى مۇمكىن. الايدا اتالعان تاعامنىڭ قاۋىپتى تۇستارى دا جوق ەمەس.
«جاپون اسحاناسىندا تاعامدىق ونىمدەر تەرميالىق وڭدەۋدەن وتە بەرمەيدى. ءدال وسى سەبەپتى روللار قاۋىپتى بولۋى مۇمكىن. شيكى بالىق ەتىن تۇراقتى تۇردە تۇتىنۋ بارىسىندا ىشەك قۇرتتارىن جۇقتىرۋ قاۋپى بار» ، - دەيدى سانيتارلىق دارىگەرلەر.
ولاردىڭ سوزىنشە، مۇزداتىلماعان بالىقتا از ۋاقىت ىشىندە اۋرۋ تۋدىراتىن باكتەريالار داميدى.
ال تابيعي ۆاسابي جاپوندىق اقجەلكەك تامىرىنىڭ ۇنتاعىنان جاسالادى. ناعىز ءۆاسابيدى دايىنداۋ قىمبات تۇسەدى. سوندىقتان كوبىنە ءۆاسابيدى اقجەلكەكتىڭ قولجەتىمدى تۇرلەرىنە بوياعىشتار، دامدەۋىشتەر مەن حوش يىستەندىرگىشتەر قوسۋ ارقىلى دايىندايدى.
سونىمەن قاتار سۋشي مەن روللعا ءدام بەرەتىن سويا سوۋستارى دا قاۋىپسىز ەمەس.
«ونىڭ قۇرامىندا كوپ مولشەردە تۇز بار. سوندىقتان مولشەردەن تىس كوپ جەۋگە بولمايدى. ادام اعزاسىنداعى ارتىق تۇز قابىنۋعا الىپ كەلۋى مۇمكىن. سونىمەن قاتار قان قىسىمى جوعارى ادامدار ءۇشىن كوپ مولشەردە تۇز جەۋ گيپەرتونيالىق اسقىنۋ قاتەرىمەن قاۋىپتى. وعان قوسا تۇزدا قان تامىرلاردا جينالىپ قالاتىن قاسيەت بار. سويا سوۋسىنىڭ ءبىر- ەكى اس قاسىق مولشەرىندە 2 گراممعا دەيىن تۇز بار. ال تۇزدىڭ تاۋلىكتىك قالىپتى مولشەرى - 5-8 گرامم» ، - دەيدى كوميتەتتىڭ باسپا ءسوز قىزمەتىندەگىلەر.
سونداي- اق، دارىگەرلەر جۇكتى ايەلدەر مەن بالالارعا شيكى، قاقتالعان جانە ىستالعان بالىق ەتى قوسىلعان سۋشي مەن روللداردى جەمەۋگە كەڭەس بەردى. ەلىمىزدە روللدارعا كوبىنە «فيلادەلفيا» ىرىمشىگى قوسىلادى.
«وندىرىستىك ادىسپەن ازىرلەنگەن اتالعان ءونىمنىڭ قۇرامىندا تۇراقتاندىرعىشتار، كونسەرۆانتتار مەن حوش يىستەندىرگىشتەر بار. حيميالىق زاتتار دا روللداردىڭ زياندىلىعىن كورسەتەتىن ءتىزىمدى تولىقتىرادى. ال سۋشي مەن روللداردى ءسۇيىپ جەيتىن ادامدار اتالعان تاعامدى تەك سەنىمدى جاپون مەيرامحانالارىنان تاپسىرىس بەرىپ الىپ، كۇماندى سايتتاردان اۋلاق بولعانى ءجون» ، - دەيدى كوميتەتتەگىلەر.
