قازاقستاندىق وقۋشى ەينشتەين ساباق بەرگەن ايگىلى ۋنيۆەرسيتەتكە قابىلداندى

 استانا. قازاقپارات - پاۆلوداردا مەكتەپ بىتىرگەلى وتىرعان ءامىر مۇحاممەد- ءالي ا ق ش- عى پرينستون ۋنيۆەرسيتەتىنە قابىلدانعان. باعدارلامالاۋ جانە ينجينيرينگ فاكۋلتەتىندە وقىماق.

 ماتەماتيكا مەن فيزيكادان سىنىقتاردى وڭاي تاپسىرعان. ال اعىلشىن تىلىنەن قينالعان، سەبەبى جاي ساۋاتتىلىق ەمەس، اعىلشىن تىلىندە ويلاي الۋ قابىلەتى تەكسەرىلگەن.

بۇل تۋرالى استانا ارناسى حابارلايدى.

بۇل ۋنيۆەرسيتەت الەمدەگى ەڭ ۇزدىك جەتىلىككە كىرەتىن ءبىلىم وشاعى. ءامىر تاۋلىگىنە 7-8 ساعات دايىندالىپ عانا قويماي، بەلگىلى عالىمداردان قاشىقتىقتان كەڭەس العان.

مەكتەبىندەگىلەر دە ءامىردى ەرەكشە تۇلعا دەپ ماقتاپ وتىر. بالانىڭ بويىندا ۇشقىننىڭ بارىن ءاۋ- باستان بايقاعان جاننىڭ ءبىرى - سىنىپ جەتەكشىسى كۇلكەن قابىلوۆا. ءامىردى العاش كورگەننەن «ەرەكشە» جەتكىنشەك ەكەنىن اڭعارعان.

«ول وتە قاراپايىم. كەز كەلگەن ۋاقىتتا كومەك سۇراعان جولداستارىنا كومەكتەسۋگە تىرىسادى. جانە ءبىر جاقسى جەرى ونىڭ ادامگەرشىلىك قاسيەتى وتە جوعارى. ءبىلىم مەن تاربيە ەگىز دەپ ايتادى عوي. بالانىڭ ءبىلىمى دە بار، تاربيەسى دە سونداي جوعارى. اتا- اناسى ۇستاز بولعاننان با، جوق الدە بالانىڭ ومىرگە دەگەن قۇلشىنىسى ما، بىردەن ايتقانىڭدى قاعىپ الادى. جانە سودان اينىماۋعا تىرىسادى. جانە ءبىر رەت جاساعان قاتەسىن قايتىپ قايتالامايدى» ، - دەيدى ءامىر مۇحاممەد- ءالي وقيتىن سىنىپتىڭ جەتەكشىسى كۇلكەن قابىلوۆا.

مۇعالىمدەرى ءامىردىڭ كۇردەلى سيتۋاتيۆتى تاپسىرمالاردى ستاندارتتى شەشپەيتىنىن ايتادى. ول بيىل ماتەماتيكادان رەسپۋبليكالىق وليمپيادادا ءتورتىنشى رەت جەڭىمپاز اتاندى. بىلتىر دا، الدىڭعى جىلى دا حالىقارالىق وليمپيادالاردان التىن مەدالدار العان (بىلتىر ريودا، الدىڭعى جىلى گونكونگتە وتكەن. )

ءبىر قىزىعى، ءامىر مۇحامەد- ءالي جەتىستىگىنە كوڭىلى تولا قويمايدى. «ارمانىم ەڭ ۇزدىك سانالاتىن ماسساچۋسەتس تەحنولوگيا ينستيتۋتى بولاتىن» ، دەيدى جاس دارىن.

ۇستازدار وتباسىندا دۇنيەگە كەلگەن ونىڭ ماتەماتيكاعا دەگەن قۇلشىنىسى مەكتەپكە بارعاننان بايقالعان. ال 6- سىنىپتان تياناقتى دايىندالا باستاعان. وسە كەلە بۇل ءپان تەك وليمپيادالىق جەڭىستەر مەن حوببي ەمەس، ماقساتقا جەتۋدىڭ ءبىر قۇرالى ەكەنىن تۇسىنەدى.

ءامىر قىسقا قايىردى - ماقساتىم، قۇراما شتاتتاردا تەرەڭ ءبىلىم الىپ، تاجىريبە جيناۋ. ال ەلگە قايتىپ ورالۋ... بۇل ءامىر ءۇشىن كۇردەلى سۇراق.

«مەن ەلىمدى جاقسى كورەمىن. بۇل مەنىڭ تۋىپ- وسكەن جەرىم عوي. دەگەنمەن وبەكتيۆتى ويلانىپ كورەلىكشى. شىن مانىندە قازاقستاندىق جوعارعى وقۋ ورىندارى ا ق ش ۋنيۆەرسيتەتتەرىمەن سالىستىرساق، كوش سوڭىندا. ال مەن ءوزىمنىڭ پوتەنتسيالىمدى باعالانبايتىن باعىتقا بەكەر شاشقىم كەلمەيدى. كەرىسىنشە، تولىقتاي پايدالانسام دەگەن ماقساتىم بار. ەگەر «اقىلدى بالالار» ەلدە قالاتىن بولسا، ولار اعارتۋشىلىقپەن اينالىسار ەدى. ياعني، باسقالاردى ۇيرەتەدى. ويتكەنى ءبىلىمدى ءبولىسۋ كەرەك. ال، «اقىلدى بالا» قازاقستاندا قالۋ ءۇشىن ونى بۇل جاقتا ءبىر نارسە تارتىپ تۇرۋى كەرەك. ويىما ءتۇسىپ تۇرعانى - ەڭبەكاقى...» ، - دەيدى پاۆلودار وبلىستىق «جاس دارىن» مەكتەبىنىڭ 11-سىنىپ وقۋشىسى ءامىر مۇحاممەد- ءالي.

ءامىر ەندى البەرت ەينشتەين ساباق بەرگەن، امەريكالىق ساياساتكەرلەر، عالىمدار، قوعام قايراتكەرلەرى وقىعان ۋنيۆەرسيتەتكە كەتەدى.