جەمقورلار ءوزىنىڭ وتباسىنا «قارا داق» قالدىرىپ وتىر - شپەكبايەۆتىڭ كومەكشىسى
«ماسەلەن، ءبولىم باسشىسى ورىنباسارىنىڭ نە ىستەپ جاتقانىن نەمەسە باسقارما باسشىسى قاراماعىنداعى قىزمەتكەرلەردىڭ تەرىس ارەكەتتەرىن بىلمەۋى مۇمكىن ەمەس. ءبىز تەك فاكتى بويىنشا قاراستىرامىز. قىلمىس ورىن السا، وندا وعان ارەكەت ەتۋگە ءتيىستىمىز. مەملەكەتتىك مەكەمە مەن ورگانداعى سىبايلاس جەمقورلىق قىلمىسىن توتەنشە جاعداي رەتىندە باعالاۋ كەرەك. ءتۇرلى دارەجەدەگى باسشىلار باعىنىشتى قىزمەتكەرلەردىڭ جەمقورلىق قۇقىق بۇزۋشىلىقتار ءۇشىن جەكەلەي جاۋاپتى بولادى»، - دەپ توقتالدى ول.
حاكيم كۇشقاليەۆتىڭ سوزىنە قاراعاندا، وسى جىلدان باستاپ الدىن الۋ شارالارىنا ەكپىن قويۋ ماقساتىندا جازالاۋ ءىس- قيمىلدارى تومەندەتىلىپ كەلەدى.
«بۇل - سىبايلاس جەمقورلىقپەن كۇرەس شارالارى ازايىپ جاتقاندى بىلدىرمەيدى. مەملەكەتكە وسى قىلمىستار ءۇشىن سوتتالعانداردى اباقتىدا ۇستاۋ ەكونوميكالىق تۇرعىدان ءتيىمدى ەمەس. اتاپ ايتقاندا، 400 مىڭ، 50 مىڭ، 10 مىڭ سوماسىندا پارا الىپ ۇستالعاندار بار. وسى قىلمىستار ءۇشىن ايىپتىلار 5-7 جىل ارالىعىندا باس بوستاندىعىنان ايىرىلادى. الايدا سوتتالعانداردى ۇستاۋ مەملەكەت ءۇشىن قىمباتقا تۇسەدى. جىل ىشىندە سوتتالعان ءبىر ادامعا مەملەكەت 1 ميلليون تەڭگەدەن استام قارجى جۇمسايدى. نەگىزى، بۇل قوماقتى قارجى قولداۋدى قاجەت ەتەتىن الەۋمەتتىك جوبالارعا جۇمسالعانى دۇرىس بولار ەدى»، - دەدى ول.
ح. كۇشقاليەۆ مەملەكەتتىك قىزمەتشىلەردىڭ زاڭسىز ءىس- قيمىلدارىنان تۋىندايتىن كەرى سالدارعا توقتالدى.
«جەمقورلىق قىلمىسىنا بارعان ادامداردىڭ وتباسى، بالا- شاعاسى نەگە زارداپ شەگۋى كەرەك؟ بۇل ادامدار قىلمىس جاساۋ ارقىلى ءوزىنىڭ وتباسىنا «قارا داق» قالدىرىپ وتىر. ول وزىنە عانا ەمەس، سونىمەن قاتار بالالارىنىڭ بولاشاعىنا زالالىن كەلتىرەدى. سەبەبى مەملەكەتتىك قىزمەتكە كەلەر الدىندا ۇنەمى اتا- انالارى، ولاردىڭ مالىمەتتەرى مەن سوتتىلىعى اتاپ كورسەتىلەدى»، - دەدى ول.
اۆتور: رۋسلان عابباسوۆ
